Astanadaǵy «Tilep Qobyz saraıynda» balalarǵa arnalǵan sahnalyq qoıylym ótedi
ASTANA. 27 jeltoqsan. QazAqparat - 2012 jyldyń 29 jeltoqsan kúni Astana qalalyq «Tilep Qobyz saraıynyń» kontsert zalynda balalarǵa arnalǵan «Maqta qyzdyń basynan keshkenderi» atty sahnalyq qoıylymy ótedi, dep habarlady «Balapan» telearnasy.
Jańa jyl - tek úlkender úshin emes, balalardyń da asyǵa kútetin merekesi. Osy merekede «Balapan» arnasy kishkentaı kórermenderine qazaqtyń tanymal «Maqtaqyz ben Mysyq» ertegisiniń jelisimen jańa jyldyq kóńildi qoıylym jasaýdy josparlaýda.
Balalarǵa arnalǵan tuńǵysh mıýzıkl kórermenderdi ǵajaıyp sıqyr álemine jeteleıdi. Jańa jyldyq qoıylymǵa ertegi keıipkerleri Maqta qyz, Aıaz ata, sondaı-aq Panda, Spaıder Men, Aleks, Glorııa, Martın, Bella, Rapýntsel, Sınderella, tórt túlik mal, on eki aı- jyl ıeleri, qasqyr, jalmaýyz kempir sııaqty 20-ǵa jýyq balalardyń súıikti qýyrshaqtary qatysady.
«Balapan» telearnasy ashylǵan 2 jyldyń ishinde kórermen kózaıymyna aınalyp úlgerdi. Ulttyq tárbıeni basty maqsat etken telearna, qazaqtyń aýyz ádebetin de keńinen nasıhattaýdy qolǵa aldy. Al bul arqyly balanyń ómirge degen kózqarasyn, qazaqy oı-órisin damytýdy kózdeýde.
