Astanadaǵy temir jol vokzaly meımandardy «amandasyp» qarsy alatyn boldy
ASTANA. QazAqparat - Elordanyń Saryarqa aýdanyndaǵy temir jol vokzalynda «SALEM ASTANA» atty jazý paıda boldy, dep habarlaıdy QazAqparat tilshisi.
Ol týraly Astana qalasy Saryarqa aýdany ákimi Arman Turlybek óziniń feısbýk paraqshasynda jazdy.
«Mine, budan bylaı temir jol kóligi arqyly el aralaǵan qonaqtar men qalalyqtardy elorda osylaı kútip alatyn boldy. Kóptegen adamdardyń Astanaǵa kelgendegi alǵashqy áseri dál osy bizdiń aýdanda ornalasqan vokzalda qalyptasyp qalatyny aıqyn. Al dál osyndaı jazý jolaýshylardy qýantyp tastaıdy degen senimdemin», - dep jazdy Arman Turlybek.
Aq jáne qyzyl tústi jazba birshama úlken áriptermen jazylǵan.
«SALEM ASTANA deńiz, sonda qala sizdi mindetti túrde qurmetpen qushaq jaıa qarsy alady», - deıdi Arman Turlybek.
