Astanadaǵy telekópir: Jańa energetıkalyq zaýyttar jumysyn bastady
«Táýelsizdiktiń 27-shi jylynda «KEGOC» Ulttyq kompanııasy «Soltústik - Shyǵys - Ońtústik» jobasynyń ekinshi kezeńin iske qosýǵa daıyn. Joba bıýdjet qarajatynsyz júzege asty. Qurylys barysynda 500 kV jańa úsh qosalqy stantsııa men 1770 shaqyrym elektr jelisi salyndy. Jobanyń arqasynda suranysy artyp kele jatqan elimizdiń ońtústik aımaǵy elektr qýatymen qamtamasyz etilip, shyǵys óńirinde taý-ken ónerkásibiniń damýyna jaǵdaı týady. Osylaısha, biz Qazaqstannyń energetıkalyq qaýipsizdigin arttyramyz», - dedi «KEGOC» AQ Basqarma tóraǵasy Baqytjan Qajıev.
«Gas Processing Company» JShS-nyń tehnıkalyq dırektory - joba jetekshisi Bolat Saqtaǵanov Aqtóbe oblysyndaǵy «Qojasaı» ken ornynda quny 42 mlrd teńge bolatyn ilespe gazdy kádege jaratý jáne óńdeý jónindegi zamanaýı zaýyttyń salynǵanyn baıan etti.
«Biz sizdiń eldiń ishki naryǵyn taýarlyq gazben toltyrý jáne resýrstyq bazasyn arttyý tapsyrmańyzdy oryndadyq. Shıkizatty qaıta óńdeýdi arttyra otyryp, ónimniń jańa túrlerin ıgerýge jáne taıaý jáne alys shetelge eksporttaýǵa daıynbyz. Asa mártebeli, Nursultan Ábishuly, eki energetıkalyq keshendi qosýǵa ruqsat etińiz!»,- dedi Bolat Saqtaǵanov.
Elbasy atalǵan energetıkalyq keshenderdiń jumysyna sáttilik tilep, iske qosty.
«Birinshi aıtylǵan keshen baıaǵydan beri armandap júrgen - Shyǵys Qazaqstan arqyly Taldyqorǵan men Almatyny elektr júıesimen qosý bolatyn. Ol bolmaı turǵan kezde Almaty oblysynyń ortalyǵy Taldyqorǵan elektr energııasy júıesinen shetteý edi. Minekeı, qazir tuńǵysh ret eki óńirdi órkendetý úshin elektr qýatyn iske qostyq. Bul óte qýanyshty jaǵdaı», - dedi Nursultan Nazarbaev.
Memleket basshysy elimizdiń ońtústiginen ortalyqqa qaraı «Saryarqa» magıstraldy gaz qubyrynyń tartylyp jatqanyn jáne ol halyqtyń ál-aýqatyn jaqsartý úshin jasalý ústinde ekendigin basa aıtty.
«Sondyqtan óte qýanyshty jaǵdaımen quttyqtaımyn. Óndiristiń daıyn bolǵanymen quttyqtaımyn. Іske qosaıyq, aq jol, sátti bolsyn!», - dedi QR Prezıdenti.
