Astanadaǵy Táýelsizdik alańynda Naýryz merekesinde «Jastar shańyraǵy» ornatylady
ASTANA. 21 naýryz. QazAqparat - Erteń, 22 naýryzda Astanadaǵy Táýelsizdik alańynda jastar men stýdenttik uıym atynan Naýryz meıramyn merekeleýge oraı «Jastar shańyraǵy» atty kıiz úı ornatylady. Bul týraly QR Jastar Parlamentiniń baspasóz qyzmeti habarlady.
Bul sharanyń uıymdastyrýshysy - Astana qalasyndaǵy joǵarǵy bilim ordalary men Astana qalasyndaǵy QR Jastar Parlamentiniń fılıaly. Kıiz úı ulttyq áshekeılermen bezendiriledi. Sonymen qatar bul jerde uıymdastyrýshy ýnıversıtetterdiń shaǵyn murajaıy qurylady.
Bul sharaǵa stýdenttiń úkimet atynan - Nazarbaev Ýnıversıteti, Femıda atynan - Qazaq gýmanıtarlyq zań ýnıversıteti, belsendi jastar atynan - Qazaq Ulttyq óner ýnıversıteti, jastar isteriniń komıteti atynan -«Turan Astana» jáne Astana ýnıversıtetteri qatysady.
Kıiz úıdiń janynda qonaqtarǵa arnaıy jasalǵan dámdi taǵamdar, ulttyq oıyndar men saıystar, qazaqtyń salt dástúrin sıpattaıtyn túrli-túrli kórinister jáne mýzykalyq súıemeldeý uıymdastyrylady. Sonymen qatar qazaqtyń ulttyq bıi «Qara jorǵany» bıleýge 50 stýdent qatysady.
Jobanyń maqsaty - Astana qalasynyń jastaryn ejelgi túrki tildes halyqtarynyń Naýryz merekesiniń salt-dástúri men ádep-ǵuryptarymen tanystyrý jáne bul meıramdy bir shańyraq bolyp toılaýǵa jumyldyrý, sonymen qosa, barsha Astana qalasyndaǵy jastardyń belsendiligin arttyrý maqsatynda qaladaǵy joǵary bilim ordalaryndaǵy stýdentterdiń kooperatıvtik jumystary men biliktiligin kórsetý bolmaq.
