Astanadaǵy taekvondodan gran-prı jarysyna alty Olımpıada chempıony qatysady
ASTANA. QazAqparat - Astanada ótetin taekvondodan Búkilálemdik gran-prı serııasy kezeńine eki júzden artyq sportshy qatysady.
Qazaqstan taekvonda federatsııasynyń baspasóz qyzmetinen habarlaǵandaı, qatysýshylardyń arasynda ataqty sportshylar da bar. Sonymen Astanaǵa baıraqty básekede baq synaý úshin erler arasyndaǵy qazirgi Olımpıada chempıondary Hoel Gonsales (Ispanııa), Servet Tazegıýl (Túrkııa), Sebastıan Krısmanıch (Argentına), Karlo Molfetta (Italııa) keledi. Olardyń qatarynda sondaı-aq 2000 jáne 2004 jylǵy Olımpıada jeńimpazy amerıkandyq Stıven Lopes te bar. Al áıelder arasynan eki dúrkin álem chempıony jáne eki dúrkin Olımpıada chempıony qytaılyq Ý Tszınıýı (2008, 2012) bolmaq. Sondaı-aq Astana halqy Aaron Kýk (Anglııa, úsh dúrkin álem chempıony), Daba Modıbo Keıta (Malı, eki dúrkin álem chempıony), Albert Gaýn (Reseı, álem chempıony), Sharlot Roýz Kreıg (AQSh, álem chempıony men Olımpıada oıyndarynyń júldegeri), Nur Tatar (Túrkııa, London Olımpıadasynyń kúmis júldegeri), Muhammad Bahcherı (Iran, London Olımpıadasynyń kúmis júldegeri), Alekseı Denısenko (Reseı, Olımpıada oıyndarynyń qola júldegeri) syndy aty álemge áıgili sportshylardyń ónerin tamashalaý múmkindigine ıe bolmaq. Al Búkilálemdik Gran-prıge qatysatyn Qazaqstan quramasyn taǵy da esterińizge sala keteık. Erlerden 58 kg - Nursultan Mamaı, 68 kg - Qaırat Sarymsaqov, 80 kg - Maqsat Abdrambek, +80 kg - Smaıl Dúısebaı óner kórsetse, áıelder komandasy sapynan 49 kg - Farıza Aldońǵarova, 57 kg - Ásel Qoılybaı, 67 kg - Gúlim Bıbalaeva men +67 kg - Ferýza Ergeshova, Mereke Júnisova kórinbek. Aıta keteıik, jarys 29-31 tamyz aralyǵynda «Dáýlet» sport kesheninde ótedi.
