Astanadaǵy sý tapshylyǵy – táýligine 25 myń tekshe metr

ASTANA. QazAqparat – Astanadaǵy sý tapshylyǵy máselesi 2026 jyly sheshiledi. Bul týraly QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly aıtty, dep habarlaıdy QazAqparat tilshisi.

«Elorda turǵyndaryna sý Astana sý qoımasynan jiberiledi, onda táýligine qýaty 305 myń tekshe metr bolatyn eki sý sorǵy stantsııasy jumys isteıdi. Jalpy 2026 jyldyń sońyna deıin sý máselesin tolyq sheshedi. Oǵan qosa, Astana ákimdigimen birlesip, tórtinshi sý sorǵysyn stantsııasyn salý josparlanǵan», - dedi Á. Pazylbekuly ortalyq kommýnıkatsııalar qyzmetinde ótken baspasóz máslıhatynda.

Qazir elorda turǵyndaryn úzdiksiz sýmen jabdyqtaý úshin jalpy quny 59 mlrd teńgeni, qýaty 105 myń tekshe metrdi quraıtyn jańa sorǵy-súzgi stantsııasyn salý jobasy iske asyp jatyr.

«Sebebi, búginde elordada táýligine 25 myń tekshe metrden astam aýyz sý tapshylyǵy bar. Osyǵan baılanysty keıbir aýdandarda beriletin sý qysymynyń tómendeýi baıqalady. Bıyl jobany aıaqtaýǵa respýblıkalyq bıýdjetten 27 mlrd teńge bólindi. Ony jyldyń ekinshi jartyjyldyǵynda aıaqtaý oıda bar», - dedi Ázimbek Pazylbekuly.

Buǵan deıin spıker Qazaqstan halqynyń 96% aýyz sýmen qamtylǵanyn, 2025 jyly bul kórsetkish 100% jetetinin aıtqan edi.

Sonymen birge, bıyl halyqty sýmen jabdyqtaý jumystaryna el bıýdjetinen 280 mlrd teńge bólingen.