Astanadaǵy sý tapshylyǵy: Qala ákimdigi saıajaı ıelerine úndeý jasady
«Qala halqynyń sany artyp, qurylystyń kóbeıýine baılanysty «Astana Sý Arnasy» kásiporny aýyz sý óndirisinde qıyndyqtar sezinip jatyr. Sonyń saldarynan 2023 jyldyń 28 naýryzynda sý qysymyn retteý baǵytynda sharalar qabyldap, sý berýdiń kestesin belgileýge májbúr boldy.
Onyń ústine jasyl jelek pen baý-baqsha sýaratyn sýdyń úlesi keń. Osyǵan baılanysty ótken demalys kúnderi kópshiligińiz sý berýde shekteý bolǵanyn sezindińiz.
Qazirgi tańda búkil saıajaı ıelerin belgilengen ýaqytty qatań ustanýdy, sýarý jumystaryn saǵat 23.00-den bastap 6.00-ge deıin júrgizýdi suraımyz», - delingen taratylǵan habarlamada.
Al bul ýaqytta sýarý qolaısyz dep esepteıtin turǵyndarǵa tehnıkalyq sýdy satyp alý usynylyp otyr. Ony satyp alýǵa bolatyn mekenjaılar da kórsetilgen:
1. KOS, Qorǵaljyń tasjoly kóshesi, 47
2. Kóktal kóshesi, 1. «Tulpar» at klýbynyń aýdany
3. Alash tasjoly, Avtomatıka KNS-28
4. Jansúgiruly kóshesi, 7
5. Ǵ.Mustafın jáne Qobylandy batyr kósheleriniń qıylysy.
Sondaı-aq mekeme ókilderi turǵyn úı keshenderinde sý qysymy azaıǵany baıqalsa, úıge qyzmet kórsetetin kompanııalarǵa júginip, sý soratyn sorǵylardyń ámbebap qysym deńgeıin retke keltirýdi suraý kerektigin aıtyp otyr.
«Qalyptasqan jaǵdaıda úıdegi turmystyq jumystardy aptanyń jumys kúnderine josparlaý usynylady. Bul ásirese demalys kúnderi qarbalas saǵattarda sý qubyry júıesine túsetin salmaqty jeńildetedi.
Ýaqytsha qabyldanyp jatqan sharalar jańa sorǵy-súzý stansasy iske qosylǵanǵa deıin jalǵasatynyn aıta keteıik. Stansa qurylysy 2021 jyly bastalǵan bolatyn. Onyń qýaty táýligine 105 myń tekshe metr sýdy súzýge jetedi. Bul búkil qalaǵa beriletin sýdyń kólemin ulǵaıtýǵa múmkindik beredi. Bul nysannyń qurylysyn aldaǵy jyldary aıaqtaý josparlanǵan.
Sý berýmen baılanysty týyndaǵan ýaqytsha qolaısyzdyqtar úshin keshirim ótinemiz jáne qalyptasqan jaǵdaıǵa túsinistikpen qaraýdy suraımyz», - delingen resmı málimette.