Astanadaǵy sport kesheni. Kıim aýystyrý bólmesine kameralar nege ornatyldy
Mıras Shekenov esimdi Facebook áleýmettik jelisin paıdalanýshy «Alataý» sport kesheninde erlerdiń kıim iletin bólmesinde beınekameralar ornatylǵanyna narazylyq bildirgen bolatyn.
Osy oraıda QazAqparat tilshisi sport kesheniniń ákimshiliginen atalǵan máseleniń mán-jaıyn surastyrdy.
Keshen basshysynyń orynbasary Denıs Ýstınovtyń atap ótýinshe, basseınge kelýshiler zattarynyń joǵalý oqıǵalary jıilep ketkendikten, beınekameralardy ornatýǵa týra kelgen.
«Bizde erlerdiń kıim iletin bólmesinde urlyq oqıǵalary jıi baıqala bastady. Osy rette jergilik polıtsııa qyzmeti bizge bul máselege qatysty tıisti sharalardy qabyldaýǵa ótinimderin joldady. Bizdiń bıýdjetti eskere otyryp, sharalardy júzege asyrý sál qıyndaý boldy. Sebebi qundy zattar úshin «lokerlerdi» nemese jańa shkaftardy ornatý aıtarlyqtaı qarjy shyǵynyn qajet etedi. Bul turǵyda bizge bul sharalar qoljetimdi emes, sondaı-aq osy zattardy memlekettik satyp alýlar josparyna erterek engizý kerektigin de eskerý qajet. Al baqylaý kemerasyn ornatýǵa mundaı qadamdar qajet emes», - deıdi ol.
Degenmen de ol jaqyn arada sport kesheninde atalǵan máselege baılanysty basqa sharalar qabyldanatynyn atap ótti.
«Endi biz qajetti jabdyqtardy memlekettik satyp alýlarǵa engizdik jáne qundy zattarǵa arnalǵan lokerler taıaýda ornatylady. Bizge osy jabdyqtar jetkizilgenshe, urlyqqa tosqaýyl qoıý kerek boldy, sebebi kamera bolmaǵan kezde zattardyń joǵalýy kún saıyn oryn aldy. Sondyqtan amalsyzdan osyndaı sheshimge bardyq»,- dedi ol.
Onyń sózine qaraǵanda, beıne kamera turǵasyn, urlyq kúrt tómendedi. «Kameralar ornatylǵannan keıin bizde tek 2-3 oqıǵa ǵana tirkeldi. Degenmen aıyptylar lezde tabyldy», - dedi Ýstınov.
Sport kesheni ákimshiliginiń ókili bundaı shara tek erlerdiń kıim iletin bólmesine qatysty qabyldanǵanyn jetkizdi. Onyń aıtýynsha, áıelder bólmesinde mundaı oqıǵalar tirkelmegen.