Astanadaǵy sport ǵımarattarynyń laýazymdy tulǵalary zań buzýshylyqqa jol berip kelgen - prokýratýra
ASTANA. 11 qańtar. QazAqparat - Qazaqstan Respýblıkasy Bas prokýratýrasynyń tapsyrmasyna sáıkes Astana qalalyq prokýratýrasy qala aýmaǵynda ornalasqan sporttyq-saýyqtyrý keshenderiniń qyzmetterindegi zańdylyqtyń saqtalýy men tıimdilik máseleleri boıynsha tekserý ótkizdi. Bul týraly qalalyq prokýratýranyń baspasóz qyzmetinen habarlandy.
Tekserý nátıjesinde sport ǵımarattarynyń laýazymdy tulǵalary tarapynan jiberilgen zań buzýshylyqtar anyqtaldy. Atap aıtqanda, kommýnaldyq menshik bolyp tabylatyn sporttyq ǵımarattardyń zańsyz jalǵa berilýi, nysandardy paıdalaný maqsatynan tys qoldaný, shtattyq bapkerler quramynyń jınaqtalmaýy, tıisti biliktiligi jáne bilimi joq ınstrýktorlarmen sporttyq jattyǵýlar ótkizý, jas shamasy tıisti jasqa tolmaǵan balalardy oqytý jáne basqa da zań buzýshylyqtar anyqtalǵan.
Mysaly, «Dáýlet» sportkombınaty» memlekettik kásiporny Qazaqstan Respýblıkasynyń Týrızm jáne sport agenttigi tóraǵasynyń 2003 jylǵy buıryǵymen bekitilgen Sport mektepterinde oqý-jattyǵý protsesin uıymdastyrý tártibi týraly reglamenttiń 9 tarmaǵyn buza otyryp, tennısten bastaýysh daıyndyq toptaryna balalardy jas mólsherine baılanysty shekteýlerge qaramastan qabyldaǵan. Atalǵan reglamentke sáıkes topqa qabyldaý 7-9 jastan bastalady. Al «Alaý» muz saraıy» kásiporny dopty hokkeı, shaıbaly hokkeı, short-trek boıynsha bastaýysh daıyndyq toptaryna balalardy shekti jas mólsherine qaramastan qabyldaýy arqyly reglamentti buzǵan. Erejege sáıkes atalǵan toptarǵa balalardy qabyldaý 9-11 jastan bastalady. Osylaısha, kásiporyn buıryqtaryna sáıkes shaıbaly hokkeıge 9 jasqa tolmaǵan 41, short-trekke - 3, mánerlep syrǵanaý tobyna 6 jasqa tolmaǵan 28 bala qabyldanǵan.
«Budan bólek, sport nysandarynyń qaýipsizdik sharalarynyń tıisti túrde qamtamasyz etilmeýi faktileri anyqtaldy. «Dene shynyqtyrý jáne sport týraly» Zańnyń 15-babyna sáıkes dene shynyqtyrý jáne sport sabaqtaryn ótkizý maqsatyndaǵy nysandar men ǵımarattardy paıdalaný sanıtarlyq jáne órt qaýipsizdiq erejelerine saı bolýy qajet. Alaıda, nysandardyń barlyǵynda derlik tehnıkalyq retteý jáne metrologııa, órt qaýipsizdigi jáne sanıtarlyq-epıdemıologııalyq normalardyń buzylǵandyǵy kezdesedi. Máselen, sporttyq nysandar qyzmetkerleriniń medıtsınalyq kitapshalarynda saraptamadan ótkendigi týraly jalǵan belgi qoıylýy boıynsha 68 fakti anyqtaldy. Sondaı-aq, sport nysandarynda 1700 birlikten astam senimsiz ólshem quraldarynyń qoldanylýyna baılanysty «Ólshem birligin qamtamasyz etý týraly» Zańnyń 19-babynyń 1-tarmaǵynyń buzylǵandyǵy anyqtaldy. Kórsetilgen barlyq zań buzýshylyqtar boıynsha Astana qalasynyń prokýratýrasy memlekettik organdarǵa zań buzýshylyqty joıý týraly 8 usynys engizdi», - delingen baspasóz habarlamasynda.
