Astanadaǵy Sot aktilerin oryndaý departamenti qyzmetkeri jaýapkershilikke tartyldy
ASTANA. 6 qarasha. QazAqparat - Astana qalasy «Esil» aýdandyq prokýratýrasy qalalyq Sot aktilerin oryndaý departamenti qyzmetin tekserý barysynda azamattardyń ótinishterin tıisinshe qaramaý faktilerin anyqtady. Bul týraly Astana qalalyq prokýratýrasynyń baspasóz qyzmetinen habarlandy.
Atap aıtqanda, Astana qalasy Sot aktilerin oryndaý departamenti múlikti memleket kirisine óndirý bóliminiń bastyǵy S. Akjambaev «Zańdy jáne jeke tulǵalardyń ótinishterin qaraý tártibi týraly» QR Zańynyń talaptaryn buzyp, «Impaır» JShS dırektory V. Bezrýkovtyń aryzyn qaraý merzimin eki márte buza otyryp qaraǵan. Al «Sybaılas jemqorlyqqa qarsy kúres týraly» Zańǵa sáıkes jeke jáne zańdy tulǵalardyń aryz-ótinishterin qaraýdyń jáne óz quzyretine kiretin ózge de máselelerdi sheshýdiń zańda belgilengen tártibin áldeneshe ret buzý sybaılas jemqorlyqqa jaǵdaı týǵyzatyn quqyq buzýshylyq bolyp tabylady.
Osyǵan oraı, atalǵan fakt boıynsha aýdan prokýratýrasy bólim bastyǵyna qatysty sybaılas jemqorlyq quqyq buzýshylyǵyn jasaǵany úshin tártiptik jaýapkershilikke tartý týraly qaýly shyǵardy.
Sonymen birge, Astana qalasynyń Sot aktilerin oryndaý departamenti bastyǵynyń mindetin atqarýshy E.Baımaǵambetovtiń 2012 jylǵy 23 qazandaǵy buıryǵymen bólim bastyǵy «qyzmetin tómendetý» túrindegi tártiptik jazaǵa tartylǵan.
