Astanadaǵy «SOS Qazaqstannyń balalar qalashyǵy» 10 jyldyq mereıtoıyn atap ótti
STANA. Qyrkúıektiń 6-sy. QazAqparat /Jasulan Amanbaıuly/ - SOS Kinderdorf International halyqaralyq qorynyń prezıdenti Helmýt Kýtın Astanadaǵy «SOS Qazaqstannyń balalar qalashyǵynyń» 10 jyldyǵyna arnaıy kelip, qalashyqtaǵy balalar men olardyń ata-analaryn mereıtoımen quttyqtady, dep habarlaıdy QazAqparat.
«On jyl buryn bizdiń qalashyǵymyz osy tamasha qalanyń bir bóligine aınalǵanyna qýanyshtymyn. Biz búgin balalar men óz aramyzda, osy ýaqytqa deıin bolǵan ómirimizdegi sátti ári jaǵymsyz oqıǵalardy birge bólisýge jınaldyq. Osy istiń barlyǵy bizdiń balalarymyzdyń jaqsy ómir súrýine, jarqyn bolashaǵyna arnalǵan», dedi H. Kýtın óziniń quttyqtaý sózinde.
1949 jyly metsenat German Gmaıner degen kisi, bar jıǵan-tergenin satyp, Avstrııada alǵash balalar qalashyǵyn salady. Búginde álemde olardyń sany 450-den asyp jyǵylady. Qazaqstanda ananyń aıaly alaqanynan aıyrylǵan balalarǵa arnalǵan mundaı qalashyq alǵash 1997 jyly Almatyda, 2000 jyly Astanada jáne 2005 jyly Temirtaýda boı kóterdi. Astanalyq qalashyqta turatyn 67 bala «analarymen» birge 14 otbasylyq úıge ornalastyrylǵan.
Osydan úsh kún buryn, Halyqaralyq qordyń tóraǵasy Helmýt Kýtın Qazaqstannyń birinshi hanymy Sara Nazarbaevaǵa Qazaqstandaǵy balalar men januıalardyń jaryq ómiri úshin eleýli eńbegi men Balalar qalashyǵynyń qalyptasýy men damýyna qosqan ólsheýsiz úlesi úshin Halyqaralyq SOS Kinderdorf International qorynyń joǵary dárejeli "Qurmetti altyn saqına" syılyǵyn tabystaǵan bolatyn.
