Astanadaǵy sırek aýrýǵa shaldyqqan jalǵyz əıel Isekeshevten úı surady
"Meniń atym Moldaǵulova Baqytjan, óte sırek aýrýmen aýyratyn 2-toptaǵy múgedekpin. 2016 jyly baspana məselesimen sizdiń qabyldaýyńyzda bolǵanmyn. Sodan beri úı məselesi əli sheshilgen joq. Búkil anyqtamam bar. "Nur Otannyń", depýtattardyń qabyldaýynda boldym. Men osyndaı sırek dertpen aýyratyn Astanadaǵy jalǵyz naýqaspyn. Qazir tirkeý məselesi qosylyp ketti. Alty ret operatsııa jasaldy. Qujattarymdy joǵalyp, tegimdi ózgertken kezde meniń kezegim ótip ketken. 2013 jyldan beri úı ala almaı júrmin. Sondyqtan, meni turǵyn úı məselesi boıynsha taǵy qabyldaı alasyz ba?"-dedi Astana turǵyny Ə.Isekeshevke suraq qoıa otyryp.
"Túsinikti. Sizdiń məseleńiz esimde. Qazir Astana qalasy boıynsha 42 myń adam úı kezeginde tur. Solardyń ishinde, 2000 adamnyń otbasynda múgedek adamdar bar. Taǵy 2000 adam - jetim balalar. Sondyqtan, baspana kezegi ashyq erejemen jumys isteıdi, men sizdiń məseleńizdi ózgelerden bóle-jara qaraı almaımyn. Biraq, siz qujattarymdy joǵaltyp aldym jəne kezegim ótip ketipti dedińiz. Sondyqtan, sotqa jəne prokýratýraǵa barsańyz durys bolady",-dedi Isekeshev qala turǵynyna bergen jaýabynda. B.Moldaǵulova biraq, sotqa da, prokýratýraǵa da barǵan eken.
"Əset Órentaıuly, men 2013 jyldan beri barmaǵan jerim joq. Sotqa da, prokýratýraǵa da bardyq. Olardyń aıtýynsha, men óte sırek kezdesetin aýrýmen syrqat naýqas bolǵan soń, osyndaı sırek kezdesetin Astanadaǵy jalǵyz naýqaspyn, sondyqtan, kezeksiz úı alýym kerek eken..."-dep jaýap berdi B.Moldaǵulova.
Al, "kezekte neshinshi orynda tursyz",-degen əkimniń suraǵyna turǵyn "osy kezekpen tursam, elý jyldan keıin úı alatyn shyǵarmyn",-dep jaýap berdi.
"Jaqsy, men apparat jetekshisine tapsyrma beremin, sizdi taǵy bir ret qabyldap, məseleńizdi taǵy bir ret qaraıyq",-dedi Ə.Isekeshev.
