Astanadaǵy sınagoga jaıly ne bilemiz

NUR-SULTAN. QazAqparat – 2004 jyly Qazaqstan astanasynda Beıt Rahel atyndaǵy Ortalyq Azııadaǵy eń úlken sınagoga ashylǵan bolatyn. QazAqparat 14-15 qyrkúıekte ótetin Dástúrli jáne álemdik dinder lıderleriniń VII sezi qarsańynda atalǵan minájat úıi týraly fotoreportaj usynady.

Bizdi ravvınniń qaqpasynan ravvınniń hatshysy Ingrıd Illenzeıer kúitp aldy.

Ravvınniń ózi otbasymen syrtta júrgen bolyp shyqty. Hatshynyń aıtýynsha, sınagogaǵa adamdar eń kóp jınalatyn kún – juma. Ár jumanyń keshinde, kún batqan kezde «shabat» bastalady. Jumanyń keshinen bastalǵan «shabat» senbi kúni kún uıasyna qonǵanǵa deıin jalǵasady.

«Shabat» kúni sınagogada ravvın bastaǵan dindar adamdar qulshylyǵyn jasap, duǵalaryn oqıdy. Erler men áıelderdiń duǵa oqıtyn zaly bólek-bólek jabdyqtalǵan.

Birinshi qabatta ornalasqan erlerdiń qulshylyq zalynda pishini standartty ústelden erekshe shaǵyn ústelder birinshi nazarǵa iligedi.

Zaldyń qabyrǵasynda aınala kitap sóreleri jabdyqtalǵan. Ol sórelerden dinı kitaptyń túr-túrin tabýǵa bolady.

Ǵımarattyń qabyrǵalary kóne dinı sýrettermen, rıtýaldyq nyshandarmen kómkerilgen.

Áıelderdiń qulshylyq zaly ekinshi qabatta ornalasqan. Bul zaldyń aýmaǵy erlerdiń zalynan áldeqaıda tar. Eki zaldyń arasyn kúmbez túrindegi bos keńistik alyp tur.

«Sınagogaǵa turmystaǵy áıelder oramal taǵyp kelýi mindetti. Al turmys qurmaǵan qyzdarǵa ondaı shekteý joq»,- deıdi Ingrıd Illenzeıer.

Ǵımaratta qulshylyq zalynan bólek otbasylyq túnemeler bar. «Shabat» kezinde elektr jaryǵyn paıdalanbaý kerek. Al tamaqty aldyn ala ázirlep qoıady. Óıtkeni shabat kezinde tamaq isteýge de bolmaıdy. Tipti kólikpen júrýge de ruqsat joq. Sınagogaǵa kelgender úıine jaıaý qaıtady nemese sınagogada túnep qalady. Túnemeler sondaı dindarlar úshin qarastyrylǵan.

Ravvınniń otbasy da osy sınagogada ómir súredi. Ingrıd Illenzeıer jertóleden oryn tepken ashanadaǵy fýtbol ústelin ravvınniń balalaryna tıesili dep túsindirdi. Al ashanadan ǵımarat qyzmetishilerinen bólek «shabat» kezinde qulshylyq etýge kelgender de tamaqtanady.

Sınagoganyń shtattynda bes adam bar.

«Olardyń bári dindi qabyldaýy mindetti emes», - deıdi Ravvınniń hatshysy.

Nur-Sultan qalasynda sınagogaǵa kelip, turaqty qulshylyq jasaıtyn 60-taı otbasy bar.