Astanadaǵy ShQO-nyń jármeńkesinde bal, et, kókónis satylady
ASTANA. QazAqparat - 29-30 qyrkúıekte Astana qalasynda Shyǵys Qazaqstan oblysynyń aýylsharýashylyq jármeńkesi ótedi, dep habarlaıdy QazAqparat altaynews.kz silteme jasap.
Q.Muńaıtpasov kóshesi boıyndaǵy «Qazaqstan» sport kesheni aýmaǵynda ótetin jármeńke tańǵy 9.00-den keshki saǵat 18.00-ge deıin jalǵasady dep josparlanýda. Ónimderdiń baǵasy Astana bazarlarymen salystyrǵanda 15-20% tómen bolady.
Shyǵys jármeńkesine Óskemen, Semeı qalalarymen qatar 15 aýdan birdeı atsalysady. Kásiporyndar men sharýa qojalyqtarynyń joǵary sapaly, ekologııalyq taza ónimderin usynatyn 50 saýda orny uıymdastyrylmaq.
Bul kúni astanalyqtar Altaıdyń basty brendi - ara balyn armansyz satyp ala alady. Sondaı-aq mal eti, dándi-daqyldar, sút ónimderi, kókónis pen jemis-jıdektiń kóptegen túri satylymǵa shyǵarylady.
Jalpy quny 210 mln teńgeni quraıtyn 300 tonna aýylsharýashylyq ónimi saýdalanbaq.
