Astanadaǵy shirigen qarbyzdardyń vıdeosy týraly sarapshylar pikir bildirdi
ASTANA. QazAqparat - QR AShM komıtetiniń aýmaqtyq ınspektsııasy Astana bazaryndaǵy shirip ketken qarbyzdar týraly atyshýly beınejazbaǵa qatysty pikir bildirdi, dep habarlaıdy «QazAqparat» HAA tilshisi.
Onda aq halatty áıel «Alash» bazaryndaǵy qarbyzdardy kesip kórip, jeýge jaramsyz ekenin kórsetedi.
Áıeldiń aıtýynsha, bul qarbyzdar Ońtústik Qazaqstan oblysynan jetkizilgen.
«Bul karantınge jatqyzylatyn ónim bolyp sanalady. Ósimdikter karantıni boıynsha memlekettik ınspektorlar baqylaý júrgizýi tıis», - dep habarlady QR AShM komıtetiniń aýmaqtyq ıspektsııa bóliminiń basshysy Іlııas Júnisov.
Onyń aıtýynsha, ishki tekserýsiz naqty bir jemistiń nemese kókónistiń zaqymdanǵanyn anyqtaý múmkin emes.
«Qazir ınspektorlarǵa júkteme kóbeıdi. Qala boıynsha nysandar kóp. Jaı kózben qaraǵanda ónimniń ishki jaǵdaıyn boljaý múmkin emes. Syrtqy belgileri boıynsha kesip aıtý qıyn, qaıta saraptama júrgizý kerek», - dedi Júnisov.
«Ár oblystyń óz karantındik tekserýleri júrgiziledi. Myna ónim baqylaýdan tys satylymǵa jiberilgen sekildi. Mundaı azyqtardy baqylaýda ustaý óte qıyn - adam egistikten qarbyzdy tıep alady da, júre beredi. Ony qalaı baqylaısyń? Mundaǵy basty másele - ónimniń qaıdan kelgeni. Jalpy sapasyz jáne qaýipti ónimge urynbaý úshin, onyń syrtyna muqııat qarap, tekserip alǵan jón », - dep keńes berdi ol.
Sonymen birge, Júnisov joǵaryda atalǵan ónimniń tekserilip jatqanyn atap ótti.
«Ázirge esh tujyrymdama joq. Qarbyzdyń qaıdan buzylǵany belgisiz. Saraptama nátıjesi jaqyn arada, búgin nemese arǵy kúni daıyn bolady», - dep ýáde berdi Júnisov.
