Astanadaǵy «Shapaǵat» bazary satyldy
ASTANA. QazAqparat - Elordadaǵy «Shapaǵat» kommýnaldyq bazary 1 mlrd 335 mln teńgege satylyp ketti. Bul týraly Elektrondyq saýda alańy málimetinen belgili boldy, dep habarlaıdy QazAqparat.
Eske salsaq, byltyr kúzde «Astana» áleýmettik-kásipkerlik korporatsııasy «Shapaǵat» kommýnaldyq bazary» JShS Jarǵy kapıtalyndaǵy 100% úlesi elektrondyq saýdaǵa qoıylǵandyǵy týraly habarlady.
Elektrondyq saýda alańy saıtyndaǵy málimetke súıensek, saýdanyń bastapqy baǵasy 1 329 971 984 teńgeni qurady, al kepildik jarna - 75 750 000 teńge boldy.
Tenderlik talaptar boıynsha satyp alý-satý sharty jasalǵan kúnnen bastap 10 jyl ishinde seriktestik qyzmetiniń profılin saqtaýdy qamtamasyz etý kerek. Sonymen qatar, satýshy bekitken baǵa preıskýrantyna sáıkes, 3 jyl boıy jaldaý qunyn saqtaýdy qamtamasyz etý; 3 jyl ishinde saýda oryndarynyń sany men fýnktsıonaldyq maqsatyn ózgertpeý; seriktestik múlkiniń aýmaǵynda tehnıkalyq paıdalaný, órtke qarsy qaýipsizdik jáne qorshaǵan ortany qorǵaý erejelerin, terrorızmge qarsy is-qımyl jónindegi zańnama normalaryn qatań saqtaýdy qamtamasyz etý syndy talaptar bar.
Nysandy satyp alýshy kelisimge qol qoıylǵannan bastap 10 jumys kúninen keshiktirmeı tender qorytyndylary boıynsha anyqtalǵan somadan satyp alýdyń 30 paıyz mólsherinde avanstyq tólemdi, sonymen qatar salymnyń qalǵan 70 paıyzyn 30 kúntizbelik kún ishinde tóleýge mindetti.
Budan buryn habarlanǵandaı, 2018 jyldyń aıaǵynda «Shapaǵat» bazaryn satyp alýshy tabylmaı jatqany aıtyldy.
