Astanadaǵy semınarda Qazaqstanda memlekettik tildi kezeń-kezeńimen oqytý júıesin engizý taqyryby talqylandy
ASTANA. 15 sáýir. QazAqparat /Jasulan Amanbaıuly/ - Bilim jáne ǵylym mınıstrliginiń ókilderi, elorda mektepteriniń oqytýshylary, Aqmola jáne Qaraǵandy oblystarynyń mamandary Astanadaǵy semınar barysynda Qazaqstanda memlekettik tildi kezeń-kezeńimen oqytý júıesin engizý taqyrybyn talqylady.
Atalǵan shara, uıymdastyrýshylardyń aıtýynsha, QR Prezıdenti Nursultan Nazarbaevtiń bıylǵy Halyqqa Joldaýynda aıtqan mindetterdi oryndaý aıasynda jasalyp otyr. Onda jaqyn 10 jyldyń ishinde mektep túlekteriniń 100 paıyzy memlekettik tilde erkin sóıleıtin deńgeıde ıgerýleri qajettigi atap kórsetilgen bolatyn. Bilim jáne ǵylym mınıstrliginde habarlaǵanyndaı, bul maqsatqa jetý úshin bolashaqta tutastaı sharalar keshenin oryndaý josparlanǵan. Tájirıbede qazaq tiliniń aınalasyndaǵy ahýal kúnnen kúnge túzelip kele jatyr: jastar memlekettik tildi oqýǵa úlken qyzyǵýshylyq tanytyp keledi, al tildi oqytatyn kýrstarǵa jasy eresek azamattar kóptep jazylýda.
Semınar jumysyna orys mektepterinde qazaq tili jáne ádebıeti pánderiniń muǵalimderi qatysty. Shara kezinde pedagogtarǵa arnalǵan sheberlik-synyptary, memlekettik tildi kezeń-kezeńimen oqytýdyń kórnekti sabaqtary ótkizildi.
