Astanadaǵy Saýran-Syǵanaq kóshelerindegi qubyr apatynyń sebebi belgili boldy (FOTO)
ASTANA. QazAqparat - Astanadaǵy sol jaǵalaýdaǵy Saýran-Syǵanaq kósheleriniń qıylysyndaǵy sý qubyry tozǵan soń jarylǵan.
QazAqparat tilshisimen áńgimelesken «Astana sý arnasy» mekemesiniń sýmen qamtamasyz etý jónindegi qyzmetiniń basshysy Dúısenbaı Shaıkenov málim etkendeı, bul shyny talshyqty sý qubyry 2001 jyly tóselgen eken. Aıta keteıik, sýmen qamtý jónindegi qyzmettiń dırektory áli apat ornynda júr.
«Búgin tústen keıin Saýran-Syǵanaq kósheleriniń qıylysynda dıametri 800 mm shyny talshyqty sý qubyry jarylǵan. «Astana sý arnasynyń» qyzmetkerleri jarylǵan qubyrdyń eki shetin jaýyp tastady. Bul qubyrlar 2001 jyly salynǵan, qubyrdyń tóselgenine 14 jyl bolyp qaldy. Shyny plastık qubyrlardyń sapasy osynsha jylǵa shydamaı, jaryldy. Sondyqtan, 15 jylǵa jýyqtaǵan shyny talshyqty sý qubyrlaryn aýystyra bastaý kerek», -deıdi D.Shaıkenov.
Buǵan deıin birqatar aqparat quraldary Saýran jáne Syǵanaq kóshelerinde birneshe úı sýdan ajyratylǵanyn habarlaǵan edi. D.Shaıkenov bul aqparatty rastaı kele, qazir qurylysy áli júrip jatqan Syǵanaq kóshesindegi úıden basqa úılerdiń barlyǵyna sý qosylǵanyn habarlady.
«Búkil úılerde sý qosyldy. Túni boıy jóndeý jumystary júrgizilse, tańerteńge deıin apat saldary túgel joıyldy. Barlyǵy 8 mashına sý sordy. Qazir «Astana sý arnasynyń» qyzmetkerleri kelip, qubyr jarylǵan jerdi qazady»,-dep túsindirdi ol.
Esterińizge sala keteıik, búgin shamamen tús aýa Saýran-Syǵanaq kóshelerinde sý qubyry jarylyp, sý tórt kóshege taraǵan. Apat saldarynan baǵdarsham isten shyǵyp, osy aýdanda uzyn sonar jol keptelisi oryn alǵan edi. Qazir kóshelerdiń qıylysyndaǵy baǵdarshamdar túgeldeı jumys istep tur. Qalanyń kommýnaldyq qyzmeti jaıaý júrginshiler júretin joldardyń batpaǵy men sýyn tazalaýda.
