Astanadaǵy saýda oryndaryn taratý: Aýktsıondar jańa ádispen júrgiziledi
ASTANA. QazAqparat - Astanada "Shaǵyn bızneske arnalǵan myń oryn" atty joba iske asyrylýda. Sonyń aıasynda kásipkerler jańa pavılondardy salyp, saýda-sattyq júrgize alady. Alaıda ruqsat tek aýktsıon arqyly beriledi. Osy ýaqytqa deıin qala boıynsha 600-den astam oryn taratyldy. Endi, aýktsıonǵa blokcheın texnologııasy engiziledi, dep xabarlaıdy QazAqparat tilshisi.
Astana qalasynyń Investıtsııalar jáne kásipkerlikti damytý basqarmasynyń basshysy Álisher Ábdiqadyrovtyń aıtýynsha, buryn pavılondardy taratý jumysymen arnaıy komıssııa aınalysty. Onyń quramynda memlekettik qyzmetkerler boldy.
"Atalǵan komıssııa kimge jáne qaı jerden saýda ornyn berýdi sheship otyratyn. Qazir olaı emes. Bári naryqtyq jaǵdaıda aýktsıon arqyly júrgiziledi. Búginde biz aýktsıonnyń ózin elektrondy formatqa aýystyryp jatyrmyz. Biraq onymen shektelmeımiz. Aýktsıon blokcheın negizinde jumys isteıdi. Sebebi kásipkerler arasynda "elektrondy aýktsıonnyń ózin qoldan jasaı salýǵa bolady" degen pikir bar. Al blokcheın aýktsıonnyń nátıjesin burmalaýǵa jol bermeıdi. Sebebi "nodtardy" prokýratýra, kásipkerler palatasy jáne taǵy basqa áriptesterimiz kórip otyrady. Bylaısha aıtqanda, bireýler ózara kelisip, aýktsıonnyń nátıjesin aýystyra almaıdy. Blokcheınniń arqasynda aýktsıon barynsha ashyq bolady", - dedi Á.Ábdiqadyrov QazAqparat tilshisine bergen suxbatynda.
Onyń aıtýynsha, aýktsıonda jeńiske jetken kásipkerler pavılondy óz aqshasyna salady da, birneshe jylǵa kelisimshartqa otyrady. Sóıtip, saýda-sattyqty júrgizedi. "Meselen, tamaq ishetin jer bolsa, kárizdik júıe, sý jáne taǵy basqa máseleler eskerilýi shart. Árıne, pavılonnyń syrtqy kórinisine de basa nazar aýdarylady", - dep atap kórsetti Á.Ábdiqadyrov.
Aıta keteıik, búgin qala ákimi Áset Isekeshev saýdany damytý josparlary jaıynda aıtyp berdi.
«Saýda oryndary da yńǵaıly jerde ornalasýy shart. Sol sebepti biz qazirgi bazarlardy qaıta qurý jumysy bastap kettik. Astanada boıynsha 25 bazar bar. Bıyl jeteýi qaıta qurylady. Qalǵanyn eki jyldyń ishinde aıaqtaımyz. Budan bólek, jańa bazarlar men gıpermarketterdiń qurylysy bastaldy. Sondaı-aq "shaǵyn bızneske arnalǵan myń oryn" degen jobany qolǵa aldyq. Atalǵan oryndar barlyq jerlerde ornalasqan. Osy ýaqytqa deıin 600-den astam oryndy taratyp berdik. Endi, aýktsıonnyń kelesi kezeńin bastaımyz. Ony blokcheınniń negizinde ótkizemiz. Sonda ashyqtyq bolady", - dedi Á.Isekeshev "World of Trade 2018" Halyqaralyq konventtiń ashylý rásiminde.
