Astanadaǵy S.Seıfýllın atyndaǵy QazATÝ ǵylymı-zertteý deńgeıine kóshýdiń áleýetine ıe
ASTANA. 26 qazan. QazAqparat - Astanadaǵy S.Seıfýllın atyndaǵy Qazaq agrotehnıkalyq ýnıversıtetinde «Zertteý ýnıversıteti: ǵylym, bilim, ınnovatsııa sıntezi» atty taqyrypta oqý ornynyń 55 jyldyǵyna arnalǵan halyqaralyq ǵylymı-tájirıbelik konferentsııa ótti.
Konferentsııa jumysyna QR Parlamenti Májilisiniń depýtattary, QR Bilim jáne ǵylym, aýyl sharýashylyǵy, ındýstrııa jáne jańa tehnologııalar mınıstrlikteriniń, Reseı Aýylsharýashylyq ǵylymdary akademııasynyń, QR Ulttyq ǵylym akademııasynyń ókilderi, sondaı-aq joǵary oqý oryndary - Plovdıv aýylsharýashylyq ýnıversıtetiniń (Bolgarııa), Pýtr ýnıversıtetiniń (Malaızııa), Reseı memlekettik agrarlyq ýnıversıtetiniń, Belarýs memlekettik agrotehnıkalyq ýnıversıtetiniń, Qazaq ulttyq agrarlyq ýnıversıtetiniń, L.Gýmılev atyndaǵy Eýrazııa ulttyq ýnıversıtetiniń, Jáńgir han atyndaǵy Batys Qazaqstan agrotehnıkalyq ýnıversıtetiniń ókilderi men ǵylymı-zertteý ınstıtýttary men «QazAgroInnovatsııa» AQ ortalyqtarynyń ǵalymdary qatysýda.
QR Prezıdenti qoıǵan mindetterdiń ózektiligin eskerip, konferentsııa jumysy barysynda daıarlaýdyń jańa sapaly deńgeıine ótý, bilim berýdiń tıimdi júıesin qalyptastyrý, ǵylymı zertteýlerdi álemdik deńgeıge shyǵarý jáne ǵylymdy ınnovatsııalyq úrdiske tikeleı qosý máselelerindegi problemalar kóteriletin bolady.
«Bizdiń ýnıversıtet ǵylymı-zertteý ýnıversıteti deńgeıine kóshýdiń úlken áleýetine ıe. Osy maqsatta arnaıy baǵdarlama qabyldandy. Aýyl sharýashylyǵy sektoryndaǵy ózimizdiń salalyq baǵyttar boıynsha ǵylymı-zertteý jumystaryn atqaryp jatyrmyz. Ǵylym granttaryna bólingen qarajat somasy byltyrǵy jylmen salystyrǵanda 3 esege artty. Byltyr 71 ınnovatsııalyq patent alǵan bolsaq, bıyldyń ózinde 20 patent alaıyn dep otyrmyz», - deıdi S.Seıfýllın atyndaǵy QazATÝ ǵylym jáne ınvestıtsııalyq máseleler jónindegi prorektory Laýra Sadyqova.
