Astanadaǵy S.Seıfýllın atyndaǵy QazATÝ-ǵa jańadan qabyldanǵan 3 myńnan astam stýdent oqýlaryna kiristi
TANA. 1 qyrkúıek. QazAqparat /Gúlmıra Alıakparova/ - Búgin Astanadaǵy S.Seıfýllın atyndaǵy Qazaq agrotehnıkalyq ýnıversıteti oqýǵa jańadan qabyldanǵan 3 myńnan astam stýdentke esigin aıqara ashty.
Oılary san taraptan toǵysqan myńdaǵan stýdent ómirlik joldaryn tańdady, bolashaq mamandyǵyna qadam basty. Ýnıversıtet tabaldyryǵyn alǵash attaǵaly otyrǵan stýdentterdi saltanatty jıynda dástúr boıynsha oqý ornynyń rektory Aıtbaı Bulashev quttyqtap, aq tilegin bildirdi. Sondaı-aq, daǵdyly úrdispen armany zor, jany jaıdary jas stýdentterge tárbıe men ilim kózin ushtastyryp, baryn baǵamdaıtyn ýnıversıtet ákimshiligi men óner, mádenıet, sport syndy qoǵamnyń ár salasynda júrgen belsendi joǵary kýrs stýdentteri tanystyryldy.
S.Seıfýllın atyndaǵy QazATÝ búgingi bilim kúninde ánnen jyr tógip, bı men kúı, ázil-ospaǵymen merekelik sán-saltanat quryp, bolashaq mamandardyń kezekti 53-inshi legin saltanatty jaǵdaıda qabyldady. Elordanyń tuńǵysh shańyraǵy eńbek maıdanyna kásibı bilik ıelerin daıarlaýda aıanyp qalmasy sózsiz.
Bıyl oqý ordasy jańa oqý jylyna jalpy esepte 3 136 stýdent qabyldady. Onyń 2 437-si kúndizgi, 699-y syrttaı oqý bólimderine tústi. Magıstratýraǵa qabyldanǵan 158 adamnyń 75-i memlekettik grant ıegerleri bolyp tabylady. Onymen birge, ýnıversıtet jańa oqý jylyn ǵylymı áleýeti keńı túsken professorlyq-oqytýshylar quramymen qarsy aldy. 31 tamyz kúni JOO-da ótken Ǵylymı keńes barysynda eki professor, eki ǵylym doktory, tórt dotsent pen on alty ǵylym kandıdatynyń attestattary men dıplomdary tabys etildi. Ýnıversıtettiń 2011-2015 jyldarǵa arnalǵan Damý baǵdarlamasynda ǵylymı áleýet dárejesin 50 paıyzdan asyrý josparlanǵan bolatyn. Degenmen, baǵdarlamanyń alǵashqy kezeńin quraıtyn bıylǵy oqý jylynyń ózinde kórsetkish kóńil tolarlyq sıpatqa ıe boldy.
Aıta keteıik, JOO bazasynda byltyr ashylǵan «S.Seıfýllın atyndaǵy Qazaq agrotehnıkalyq ýnıversıteti» kolledji talapkerlerdi qabyldaýdy bıyl da júrgizdi. Olardyń sany alǵashqy oqý jylynda 142 bolsa, bıyl 298-di qurady. Kolledj túlekteri óz mamandyqtary boıynsha atalmysh ýnıversıtetke emtıhansyz qabyldanady jáne de magıstratýra, RhD doktorantýra baǵdarlamalaryn jalǵastyrýǵa múmkindikteri bar.
