Astanadaǵy S.Seıfýllın atyndaǵy QazATÝ 55 jyldyǵyn atap ótti
ASTANA. 27 qazan. QazAqparat - S.Seıfýllın atyndaǵy Qazaq agrotehnıkalyq ýnıversıtetiniń qurylǵanyna 55 jyl tolýyna oraı Astanada Beıbitshilik jáne kelisim saraıynda mereıtoılyq shara ótti.
1957 jyly irgesi qalanǵan S. Seıfýllın atyndaǵy Qazaq agrotehnıkalyq ýnıversıteti - elimizdegi eń iri joǵary oqý oryndarynyń biri. Atalmysh mereıtoıǵa oraı, QR Premer-Mınıstri Serik Ahmetov oqý ornynyń ujymyna jáne stýdentterine óziniń quttyqtaýyn joldady.
«Quramynda 68 ǵylym doktory, 286 ǵylym kandıdaty, 47 professory bar oqytýshylar kollektıvi joǵary bilikti mamandar daıarlaý isinde jemisti qyzmet etýde. Bilim jáne ǵylym salasyndaǵy álemdik tájirıbede bar ozyq ınnovatsııalardy utymdy paıdalanýda. Ýnıversıtet elimizdegi bilim berý salasynda alǵashqy qatardan kórinýde. Ýnıversıtet ujymyna, ustazdar men stýdentterge, zor densaýlyq, agrarlyq ǵylym men bilimdi damytý jolynda jasap jatqan eńbekterińizge tolaǵaı tabys tileımin!», - delingen QR Premer-Mınıstrdiń quttyqtaýynda.
Biliktiligi joǵary professorlyq-oqytýshylar quramymen qatar, ýnıversıtettiń materıaldyq-tehnıkalyq jáne ǵylymı kesheni erekshe myqty. Qazir munda 5 ǵylymı-zertteý ortalyǵy men konstrýktorlyq bıýro qurylǵan. Ýnıversıtet «Astana qalasy jastarynyń birligi aptalyǵy» jáne «Stýdenttik kóktem» festıvaldary aıasynda birneshe jyl qatarynan «Úzdik astanalyq joǵary oqý orny» dárejesin saqtap keledi.
Saltanatty sharanyń ashylýynda ýnıversıtet rektory Aqylbek Kúrishbaev, QazATÝ elimizdiń agrarlyq salasynyń qalyptasýyna baǵa jetpes úles qosqandyǵyn erekshe atap ótti. «55 jyl ishinde bizdiń ýnıversıtette 56 myńnan astam maman daıyndaldy. Olardyń ishinde memlekettik, ǵylymı qaıratkerler, iri kásiporyndardyń basshylary, ǵylym, bıznes salasynda qyzmet etip júrgen azamattar az emes», - dedi A.Kúrishbaev.
