Astanadaǵy S.Seıfýllın atyndaǵy Qazaq agrotehnıkalyq ýnıversıtetinde «Jigittiń sultany» baıqaýy ótti

Baıqaýǵa aldyn ala irikteýden ótken 11 seri qatysty. Saıystyń «Men, men edim, men edim» dep atalatyn kezeńinde jigitter ózderin tanystyryp, ulttyq kıim úlgisin kórsetti. «Jigit bilimimen kórikti» saıysynda qazaqtyń salt-dástúrleri, ǵuryptary boıynsha tanymdyq suraqtarǵa jaýap berse, «Salaýatty ómir - saltymyz» kezeńinde sporttyń qol kúresi, kir kóterý túrlerinen kúsh synasty. Al «Jigitke jeti óner de az» saıysynda kórermenderge mánerlep oqý, ulttyq aspaptarda oınaý, án aıtý jáne bı bıleý ónerlerin pash etti.

Qazylar alqasy jigitterdiń sahnada ózin-ózi ustaı bilý mánerin de baǵalady.

S.Seıfýllın atyndaǵy ýnıversıtet murajaıynyń meńgerýshisi Quttybaı Ahmetovtyń aıtýynsha, «Jigittiń sultany» men «Qyz syny» baıqaýy bilim ordasynyń qabyrǵasynda 20 jyl boıy ótkizilip keledi. «Bul jastardy ana tilin, ulttyq mádenıet pen salt-dástúrlerdi qurmetteýge tárbıeleý úshin jaqsy úrdis. Sondaı-aq mundaı saıystar stýdentke boıyndaǵy shyǵarmashylyq talantaryn shyńdaýǵa jaqsy múmkindik beredi», -dedi ol.

Qazylar alqasy, naǵyz jigittiń sultanyna tán - myńdy jyǵar biliktilik pen myńnan ozar bilimdi, kóriktilik pen tula boıy tunǵan talantty bir seriniń boıynan taba almaǵandyqtan, júldelerdi ekinshi orynnan bastap belgiledi.

Solaı, ekinshi oryn - energetıkalyq fakýltettiń 1 kýrs stýdenti Nurlybek Rahmetbekovke, úshinshi oryn - tehnıkalyq fakýltettiń 1 kýrs stýdenti Qýanbek Baýlybekke jáne ýnıversıtet janynda jańadan ashylǵan kolledjiń 1 kýrs stýdenti Serikjan Sháriphanǵa berildi.