Astanadaǵy rettelmegen jaıaý júrginshiler jolyna 57 baǵdarsham ornatylady
ASTANA. QazAqparat - Astana qalasynda 2018 jyldyń sońyna deıin barlyq 105 rettelmegen jaıaý júrginshiler jolynyń 17-si joıylyp, qalǵanyna baǵdarsham ornatylmaq, dep habarlaıdy «QazAqparat» HAA tilshisi.
«Qazirgi ýaqytta Astana qalasynda 105 rettelmegen jaıaý júrginshiler joly bar. Jyldyń sońyna deıin 57 ýchaskege baǵdarsham ornatylady. Sonymen birge, 105-tiń ishindegi 17-si alynyp tastalyp, qalǵandaryna dybys berý jolaǵy ornatylady. Buǵan qosa jaıaý júrginshiler joldary jaryqtandyrylyp, qajetti oryndarǵa qorshaý ornatylady», - dedi OKQ-da ótken baspasóz máslıhatynda Astana qalasy ІІD Ákimshilik polıtsııa basqarmasy Jol-tehnıkalyq ınspektsııa bóliminiń erekshe tapsyrmalar jónindegi aǵa ınspektory Baqytjan Altybaı.
Onyń aıtýynsha, eń birinshi kezekte áýejaıǵa barar tustaǵy Qabanbaı batyr kóshesindegi jaıaý júrginshiler jolyna baǵdarsham ornatylmaq.
Jalpy, Astana qalalyq ІІD keltirgen málimetke sáıkes, búgingi tańda qalanyń kóshe-jelileriniń jalpy uzyndyǵy 1146,6 shaqyrymdy quraıdy. 2017 jyly polıtsııa qyzmetkerleri qala ishinde 320 ret tekserý ótkizip, Astana qalasyndaǵy Jolaýshylar kóligi men avtokólik joldary basqarmasyna, aýdan ákimdikterine jáne basqa da múddeli organdarǵa 422 uıǵarym berilgen.
