Astanadaǵy Respýblıka dańǵyly qyrkúıekte jóndeledi - ákimdik
ASTANA. QazAqparat - Elordanyń basty dańǵyldarynyń biri Respýblıka kóshesin jóndeý jumystary osy jyldyń qyrkúıek aıynda bastalady.
Bul jaıynda Astana qalalyq avtomobıl joldary basqarmasynyń basshysy Ashat Qaraǵoıshın málim etti, dep habarlaıdy QazAqparat.
«2008 jylǵa deıin qalada usaq qıyrshyqty asfalt tósep keldik, al qazir - mastıkalyq-usaq tasty. Ol óziniń tıimdiligin kórsetip otyr. Kepil berilgen ýaqyty - úshten bes jylǵa deıin. Mundaı alǵashqy asfaltty Respýblıka dańǵylynda tósegen edik. Onyń kepil berilgen merzimi baıaǵyda ótkenimen áli de shydas berýde. Men ákimge aıttym, osy jyldyń qyrkúıek aıynda biz Respýblıka dańǵylyn jóndeýdi josparlap otyrmyz . Qarapaıym asfaltqa qaraǵanda mastıkalyq-usaq tasty jol jabyndysy shynymen de qymbatqa túsedi. Biraq, ol sapaly ári uzaq merzimge shydaıdy», - dedi Ashat Qaraǵoıshın.
Basqarma basshysy óz sózinde elordanyń birqatar kóshelerine tóseletin jol jabyndysynyń sapasyz bolýynan jyl saıyn jóndeý jumystary júrgiziledi degen áńgimeniń shyndyqqa múldem janaspaıtyndyǵyn basa aıtty.
«Asfaltty jóndeý merziminiń aralyǵy - úshten 5 jylǵa deıin. Al odan keıin tozyp, jaryqshaqtar, shuńqyrlar paıda bolady.Turǵyndardyń kópshiligi túsine bermeıdi. Olar bizdi jyl saıyn asfaltty aýystyrady dep aıtady. Olaı emes. Mundaı jaǵdaı bir ret qana oryn aldy. Ony merdiger salǵan edi jáne onyń kepili bar bolatyn. Sondyqtan ol óz qarjysyna joldy qaıta tósedi. Adamdar muny eki ret shyǵyndaný dep oılaıdy. Bul olaı emes. Máselen, ol asfalt tósep, kelesi jyly jol otyratyn bolsa, onda kompanııa ony qaıta qalpyna keltirýge mindetti. Bizde osyndaı ýaǵdalastyq qarym-qatynas bar. Olar 2-3 jylǵa kepil beredi», - dedi ol.
Aıta keterligi, buǵan deıin Astana qalasy ákimdiginiń baspasóz qyzmeti ınjenerlik jelilerdi tartýǵa baılanysty qaladaǵy birqatar kósheniń jabylatyndyǵyn habarlaǵan bolatyn.
