Astanadaǵy Polıtehnıkalyq kolledj halyqaralyq akkredıtteýden sátti ótti
ASTANA. Maýsymnyń 11-i. QazAqparat /Jasulan Amanbaıuly/ - Astanadaǵy Polıtehnıkalyq kolledj «Ǵımarattar men qurylystardy salý jáne paıdalaný» mamandyǵy boıynsha halyqaralyq akkredıtteýden ótti,
dep habarlaıdy QazAqparat.
Reseı Federatsııasynyń bilim sapasyn qoǵamdyq baqylaý jáne mansaptyq damý agenttigi (Máskeý) Qazaqstandaǵy oqý ornynyń oqý-ádistemelik, materıaldyq-tehnıkalyq bazasyn jáne oqytýshylar quramynyń biliktiligin, túlekterdiń eńbek naryǵyndaǵy qajettiligin eskere otyryp, onyń halyqaralyq bilim standarttaryna sáıkes ekendigin qýattady.
«Polıtehnıkalyq kolledj -qurylys salý mamandyǵy boıynsha mamandar daıarlaıtyn Qazaqstan aýmaǵynda halyqaralyq moıyndaýǵa ıe bolǵan eń birinshi oqý orny bolyp tabylady», deıdi Tehnıkalyq jáne kásiptik bilim departamenti bastyǵynyń orynbasary Alma Mýıtýnova.
Halyqaralyq agenttiktiń bas dırektory Alekseı Belokoptovtyń aıtýynsha, akkredıtteýden ótý ótinishterin Reseı jáne Qazaqstannyń 40-qa jýyq oqý oryndary bergen. Olardyń tek úsheýi ǵana álemdik sapa talaptaryna saı dep tabyldy.
