Astanadaǵy perzenthanalarǵa qatysty ózgerister bolady
ASTANA. QazAqparat - №1 qalalyq aýrýhana bazasynda da jańa perınataldyq ortalyq paıda bolady. Bul týraly Astana qalasy Densaýlyq saqtaý basqarmasy basshysynyń orynbasary Tımýr Muratov málim etti, dep habarlaıdy QazAqparat.
«2020 jyly №2 qalalyq aýrýhana men № 1 perınataldyq ortalyqty bir kópbeıindi aýrýhanaǵa biriktirý jumystary júrgiziledi. Bul rette bizde úlken aýrýhana bolady jáne onyń quramynda barsha kópbeıindi jeli men bosandyrý qyzmeti qamtylady. Em qabyldaýshylarǵa qolaıly bolýy úshin osy eki ǵımarattyń arasyn qosatyn nysan salynady», - dedi T. Muratov baspasóz máslıhatynda.
Sonymen qatar ol №1 qalalyq aýrýhana bazasynda da jańa perınataldyq ortalyqty jasaqtaý josparlanyp otyrǵandyǵyn atap ótti.
«Qazirgi kezde atalǵan aýrýhananyń aýmaǵynda jer ýchaskesi máselesi pysyqtalyp jatyr. Sol jerde perınataldyq ortalyqtyń 250 orny qamtylmaq. ıAǵnı ekinshi perınataldyq ortalyq kópbeıindi aýrýhana quramynda bolady dep kútilýde», - dep túsindirdi Muratov.
Onyń sózine qaraǵanda, Astanadaǵy úshinshi kópbeıindi aýrýhana qazirgi Temirjol aýrýhanasy bazasynda qurylady. Ol jaqyn arada qalanyń teńgerimine kóshedi. Onda Temirjol aýrýhanasy men № 3 perınataldyq ortalyqty biriktirý jolymen úlken kópbeıindi ortalyq jasaqtalady. Bul medıtsınalyq mekemeler Saryarqa aýdany turǵyndaryna qyzmet kórsetedi.
«Tórtinshi kópbeıindi aýrýhana elordadaǵy onkologııalyq ortalyq bazasynda qurylady. Osy nysanda birqatar qyzmetter damytylady», - dep túsindirdi ol.
Budan buryn habarlanǵandaı, elordada kópbeıindi úlken statsıonarlar qurylady.
