Astanadaǵy perınataldyq ortalyq júktilerdi qabyldaýdy toqtatty
ASTANA. QazAqparat - Astana qalalyq densaýlyq saqtaý basqarmasynyń basshylyǵy men dárigerler elordada eki apta ishinde úsh ret ana óliminiń tirkelýine qatysty túsinik berdi, dep habarlaıdy QazAqparat tilshisi.
Astana qalalyq densaýlyq saqtaý basqarmasynyń basshysy Kamaljan Nadyrov atap ótkendeı, ár jaǵdaı boıynsha táýelsiz komıssııa qurylǵan. Sondyqtan, qazir adam óliminiń sebebi men qatelikter týraly aıtýǵa erte.
«№1 perınataldyq ortalyq shtattyq rejimde jumys istep jatyr. Biz qazir bosaný bólimine adamdar qabyldap jatqan joqpyz. Ortalyqta bosandyrýdy ýaqytsha toqtata turý jóninde sheshim qabyldadyq. Biz muny tolyqtaı tekserý júrgizip, dıagnostıka men emdeýdiń sapasyna yqpal etýi múmkin faktorlardy anyqtaý úshin jasap otyrmyz. Qalada áıelderdi bosandyrýǵa daıyn úsh mekeme jumys istep jatyr. №1 perınataldyq ortalyqtyń naýqastary sonda aýystyryldy», - dep habarlady Nadyrov.
Qoǵamdyq densaýlyq saqtaý departamenti basshysynyń orynbasary Sarhat Beısenova perınataldyq ortalyqta aýrýhanaishilik juqpanyń aldyn alý úshin departament mamandarynyń jumys istep jatqanyn atap ótti. Qazirgi tańda zerthanalyq zertteýdi qoldana otyryp, epıdemıologııalyq tergeý júrip jatyr.
Aıta keteıik, Astanada eki apta ishinde úsh jas ana ólimi tirkelgen.
«№1 perınataldyq ortalyq jyl saıyn 12 myń áıeldi bosandyryp keledi. Sońǵy eki jylda eshqandaı ana ólimi tirkelgen joq. Sondaı-aq, ortalyqta 5 myń kúrdeli ota júrgizilýde. Osyndaı qysqa ýaqyt ishinde úsh áıeldiń baqılyq bolýy - úlken qaıǵy. Áıel adam 2 shildede 18:25-te qaıtys boldy», - dedi Nadyrov.
№1 perınataldyq ortalyǵy bas dárigeriniń orynbasary Erbol Áýbákirov úshinshi jaǵdaıdyń akýsherlik asqynýǵa qatysty ekenin atap ótti.
«Júkti áıelden qan ketip, aýrýhanaǵa tústi. Alǵashqy saǵattarda arnaıy kómek kórsetilip, kesar tiligimen bosandyryp aldyq. Balasy aman. Sábı 1800 gramm salmaqpen merzimine jetip dúnıege keldi. Bul faktor merzimine jetken júktilik kezinde balanyń qursaqta kesh damýy dep baǵalanýda.
Júkti áıeldiń medıtsınalyq qujattaryn tekserý kezinde onyń densaýlyǵynda dimkási bolǵany anyqtaldy. Ol kishkentaı kezinen sozylmaly anemııamen aýyrǵan. Júkti kezinde úsh dárimen emdegen, alaıda ol dáriler kómektespegen. Oǵan qosa, áleýmettik faktor da yqpal etken. Naýqas áıel 19 jasynan bastap zııandy ádetterge boı aldyryp, kúnine 20-30 ret temeki shekken. ıAǵnı, nıkotınge táýeldi bolǵan. Osy aspektilerdiń barlyǵy teris áser etken», - dedi Áýbákirov.
