Astanadaǵy páter baǵasy ınflıatsııa deńgeıinen asyp barady
ASTANA. QazAqparat - Qańtarda Astana boıynsha páter baǵasynyń ortasha deńgeıi sharshy metrine 2123 dollardy quraǵan, bul shamamen 327 900 teńge. Ótken aıǵa qaraǵanda árbir sharshy metr 23 dollarǵa nemese 1,1 paıyzǵa qymbattaǵan. Quny joǵary páterlerdiń baǵasy sharshy metrine 2602 dollardy qurap otyr. Onyń ósimi shamamen - 0,5 paıyz, dep habarlaıdy Forbes.kz.
Elordanyń sol jaǵalaýy nemese Esil aýdanyndaǵy páterlerdiń ortasha baǵasy $2601/sh.m (401 700 tg/sh.m) jetken. Bul joǵaryda aıtylǵan páterlerdiń ortasha qunynan 23 paıyzǵa joǵary. Kerisinshe, qalanyń oń jaǵalaýyndaǵy páterlerdiń quny $2017/sh.m (309 600 tg/sh.m) deńgeıinde tirkelgen. Bul ortasha qalalyq deńgeıden 6 paıyzǵa kem.
Al qaladaǵy eń qymbat TOP-10 turǵyn úı keshenine keletin bolsaq, olarǵa myna úıler kirgen: «Europe Palace», «Nursaıa», «Prestıj», «TsMT - Halyqaralyq saýda ortalyǵy», «Sýly-jasyl býlvar», «Aǵylshyn kvartaly», «Qalalyq romans», «Parıj kvartaly» jáne «Haıvıl Astana» endi. Olardyń baǵasy ortasha eseppen $3640-5460/sh.m aralyǵynda.
Eger Statıstıka agenttiginiń derekteri boıynsha Astanada ortasha jalaqy 156 814 teńge bolatyn bolsa, 30 sharshy metrlik ekonom sanatyndaǵy páterdi alýǵa 7 jyl 4 aı ketedi. 307 669 teńge jalaqy alatyn qarjy jáne saqtandyrý qyzmetiniń jumysshylary dál sondaı páterge 3 jyl 9 aı jınaıdy eken. Elıt sanatyndaǵy 45 sharshy metrlik úıdi alý úshin 7 jyl 8 aı boıy ter tókpek. Jalaqylary eń tómen bolyp sanalatyn ákimshilik jáne kómekshi qyzmet kórsetý salasynyń qyzmetkerleri, aı saıyn 88 234 teńge alady. Olar 30 sharshy metrlik páterge 13 jyl sarp etse, elıtaly páterge 26 jyl 7 aı boıy qarajat jınaıdy.
