Astanadaǵy Paralımpıadalyq ortalyqta 3,4 myń adam tegin jattyǵady
NUR-SULTAN. QazAqparat - Nur-Sultanda múmkindigi shekteýli jandarǵa arnalǵan mamandandyrylǵan paralımpıadalyq jattyǵý ortalyǵy jumys isteıdi. Qazirgi ýaqytta ol jerde sporttyń 17 túrinen jattyǵýlar ótkiziledi, dep habarlaıdy QazAqparat.
«Halyqaralyq deńgeıdegi mamandandyrylǵan paralımpıadalyq jattyǵý ortalyǵy 2018 jyly ashyldy. Búgingi tańda bizde sporttyń 17 túri damyǵan. Olardyń bári erekshe fızıkalyq qajettilikteri bar adamdar úshin aqysyz júrgiziledi. Bizdiń ortalyqqa kún saıyn 150-ge jýyq adam keledi. Munda 3 negizgi zal bar – jattyǵý, oıyn jáne jekpe-jek zaly. Sondaı-aq, kelýshilerge saýna jáne massaj qyzmetteri qarastyrylǵan. Ortalyq usynatyn barlyq qyzmet erekshe fızıkalyq qajettilikteri bar adamdar úshin tegin kórsetiledi», — dedi «Kaspıı» sportty damytý qorynyń atqarýshy dırektory Abdýsaıd Nazarov.
Ortalyqta ústel tennısi, paradzıýdo, parakarate, parataekvondo, ıoga, shahmat, doıby, toǵyzqumalaq, bochcha, golbol, parabadmınton, otyryp oınaıtyn voleıbol, darts, parapaýerlıftıng, paracherlıdıng, paragrepplıng jáne paraarmrestlıng sııaqty sport túrleri boıynsha jattyǵýlar ótkiziledi.
Ǵımarattyń jalpy aýdany 4 682,70 sharshy metr. Qazirgi ýaqytta ortalyq aıyna 3 400-den astam adamdy qabyldaıdy.
«Men ortalyqqa 2018 jyly ashylǵannan beri kelip júrmin. Bul biz úshin, ıaǵnı múmkindigi shekteýli jandar úshin óte yńǵaıly. Munda barlyǵy qarastyrylǵan, kıinip, sheshinetin bólmeler keń, sol sııaqty jýynatyn bólmeleri de qarastyrylǵan. Osyndaı ortalyq ashqanyna alǵysym sheksiz», — dep atap ótti ortalyqqa kelýshi Asqarbek Bólegenov.
Paralımpıadalyq jattyǵý ortalyǵynyń jumysy týraly qosymsha aqparatty 790-444 telefon nómiri arqyly alýǵa bolady.
