Astanadaǵy paradta áskerı tehnıkalar sapyn T-34 tanki bastap shyqty
ASTANA. QazAqparat Astanada «Qazaq Eli» alańynda QR Prezıdenti - Joǵarǵy Bas qolbasshy Nursultan Nazarbaevtyń qatysýymen Otan qorǵaýshy kúnine jáne Uly Otan soǵysyndaǵy Jeńistiń 70 jyldyǵyna arnalǵan áskerı parad ótip jatyr.
Jaıaý áskerler sherýi aıaqtalǵan soń, Qazaqstannyń soǵys jyldaryndaǵy jáne eń sońǵy jańa úlgidegi áskerı tehnıkalary alańǵa shyqty. Paradty T-34 tanki bastap shyqty. Bul soǵys jyldarynda aty ańyzǵa aınalǵan eń kúshti tankterdiń biri bolǵan.
Ol basqa tankterdi, quryshty avtokólikterdi jáne DOT (uzaq ýaqyt atý núktesi), DZOT (aǵash-topyraqpen bekitilgen atý orny) tıptes basqa da quryshpen qaptalǵan nysandardy jáne jaýdyń tiri kúshin joıýǵa arnalǵan. Taktıkalyq-tehnıkalyq sıpattamalary: tank ekıpajy 5 adam, tank salmaǵy 26,3 t., qarýlanýy: 76,2-mm L-11 zeńbiregi, 2 ne 3 7,62-mm DT pýlemetteri. Atys jıyntyǵy: zeńbirekke 76 atys jáne pýlemetterge arnalǵan 4725 oq, eń joǵary jyldamdyǵy 53 km/saǵ. deıin, janarmaı boıynsha júris qashyqtyǵy 400 km. QR QK qatarynda tuǵyrlar men murajaılarda 5 birligi bar. «Semeı ınjınırıng» AQ QR QK Áskerleriniń sherýine qatysý úshin T-34 tankin kúdeli jóndeýden tegin ótkizgen.
Esterińizge sala keteıik, sharaǵa qatysatyn jalpy áskerı tehnıka sany 227 birlik. QR Qarýly kúshterinen - 188 tehnıka shyǵady, onyń ishinde T-34 tankteri, ZIL-157 avtokólikteri, ZIS-2, M-30, RS30 «Katıýsha» qarýlary bar.
