Astanadaǵy Palaý-party: Ózbek, uıǵyr men ázerbaıjannyń palaýy myńnan astam adamǵa taratyldy

ASTANA. QazAqparat - Atalǵan shara Qazaqstan xalqy Assambleıasynyń uıymdastyrýymen ótti, dep xabarlaıdy QazAqparat tilshisi.

«Palaý-party»aktsııasy EKSPO-2017 kórmesine arnalyp otyr. Oǵan ózbek, uıǵyr men ázerbaıjannyń mádenı ortalyqtary atsalysyp, óz palaýlaryn daıyndady. Negizgi maqsat - Astana turǵyndary men qonaqtaryna palaýdyń túr-túrin kórsetý. Sondaı-aq, biz barsha qazaqstandyqtardy aldaǵy Astana kúnimen quttyqtaımyz. Barlyǵymyz baýyrlas xalyqpyz. Sondyqtan osy ispetti sharalar bizdi jaqyndastyra túsedi degen senimdemiz», - deıdi Astanadaǵy ózbek etno-mádenı ortalyǵynyń tóraǵasy Sherzot Pýlatov.

Onyń aıtýynsha, búgingi aktsııa aıasynda bes birdeı qazanǵa palaý pisirildi. Árbir qazanda 200 adamǵa arnalǵan portsııa boldy.

Aıta ketken jón, «Palaý-party» aktsııasyna deıin Etnoaýyldyń úlken shatyrynda merekelik kontsert uıymdastyryldy. Sol jerde Assambleıaǵa múshe basqa da etno-mádenı ortalyqtar óz ónerlerin pash etip, Astana kúnine oraı izgi tilekterin jetkizdi. Máselen, bulǵarlar «Shaqyrady kóktem» ánin qazaq tilinde shyrqap, jınalǵan jurttyń kóńilin bir kóterip tastady.

Shara aıasynda metsanattardyń syılyqtary da tabystaldy. Osy joly áleýmettik jaǵynan az qamtylǵan 37 otbasyǵa bir-bir kilemnen tapsyryldy. Kontsertten keıin xalyq daladaǵy «Palaý-party»-ge lap berdi.