Astanadaǵy oıyn-saýyq ortalyǵynda órtten qorǵanýdyń tásilderi túsindirildi
ASTANA. QazAqparat - Elordadaǵy «Han Shatyr» SOSO-da balalardy tótenshe jaǵdaılar qorǵaýǵa arnalǵan «Bizben birge» atty qaıyrymdylyq is-sharasy uıymdastyryldy, dep habarlaıdy QazAqparat.
Atap aıtqanda, bul sharany Astananyń ІІD Jergilikti polıtsııa qyzmeti, Tótenshe jaǵdaılar departamentimen, Salaýatty ómir saltyn qalyptastyrý ortalyǵymen, Qyzyl Jarty aı qoǵamynyń Astana fılıalymen birlese ótkizdi.
«Astana ákimdiginiń «Biz qaýipsiz qalany qalaımyz» jobasy aıasynda uıymdastyrdyq. Osy qaıyrymdylyq aktsııasyna qaladaǵy birqatar mektepterdiń oqýshylary qatysty. Osy oraıda tótenshe jaǵdaılar, jol-kólik oqıǵalary jáne basqa da qaterli jaǵdaılar kezinde durys áreket etýdiń qyr-syryn úıretemiz. Shara barysynda jol erejesin qatań saqtaý taqyrybyna da aıryqsha ekpin qoıyp otyrmyz», - dedi Jergilikti polıtsııa qyzmetiniń ınspektory Aıymgúl Baleeva.
Onyń sózine qaraǵanda, 2017 jyly qala aýmaǵynda oryn alǵan 88 jol-kólik oqıǵasynda balalardyń bolǵandyǵy tirkelgen. Sonyń saldarynan 8 búldirshin kóz jumdy.
«Kóbinese júrgizýshiler joldaǵy erejeni saqtamaıtyny belgili, sonyń ishinde jyldamdyqty asyrý jaǵdaılary qaýipti bolyp otyr. Munymen qosa, jaıaý júrginshiler jolaǵynda qaıǵyly oqıǵalar tirkelip jatady. Balalar mektepten shyqqannan keıin, kóbine osyndaı jolaqtar arqyly joldy qıyp ótedi. Sonymen qatar júrgizýshiler uıaly telefonyn qolyna ustaǵan kezde jolda qaýipti jaǵdaı týdyrady», - dedi A. Baleeva.
Onyń aıtýynsha, ótken jyly ıis tııýden ýlanýdyń 31 faktisi, toqqa túsýdiń 10 faktisi (onyń bireýinde bala kóz jumdy) anyqtalǵan, sondaı-aq órt jaǵdaıy boıynsha bir balanyń ómiri qıylǵan.
