Astanadaǵy órttiń jartysyna jýyǵy turǵyn úı sektoryna tıesili
ASTANA. QazAqparat - Astana qalasy Tótenshe jaǵdaılar departamenti jylytý maýsymy qarsańynda órttiń aldyn alý boıynsha brıfıng ótkizdi, dep habarlaıdy Astana qalasy ákimdiginiń resmı saıty.
Aǵymdaǵy jyldyń 8 aıynda Astana qalasy boıynsha 401 órt tirkelgen, ótken jyldyń osy kezeńimen salystyrǵanda 15%-ǵa tómendegen. Órtten 8 adam (2017 j - 10 adam) qaıtys bolǵan, onyń ishinde 1-i bala. Tótenshe jaǵdaılar departamenti bastyǵynyń orynbasary M.Qaısanovtyń aıtýynsha, órttiń basym kópshiligi jeke turǵyn úı sektorlarynda oryn alady. Atap aıtqanda, osy jyldyń 8 aıynda 187 oqıǵa (órttiń jalpy sanynan 47%) tirkelgen. Onyń 65%-y jer úılerde bolyp otyr. Jylytý maýsymy bastalysymen, jeke turǵyn úılerde órttiń kóbeıýi jáne ıis tııý oqıǵalary arta túsedi. Osy jyldyń 8 aıynda 27 adam ıis tıip ýlanǵan, ótken jyldyń osy kezeńimen salystyrǵanda 48% tómendegen (2017j - 52 adam ýlanǵan). Olardyń 22 jaǵdaıynda órt qaýipsizdigi talaptary saqtalmaǵan, 4-eýi peshti durys paıdalanbaý saldarynan, al 1 oqıǵa órt qaýipsizdigi talaptaryn buzýshylyq sebebinen bolǵan.
Ýly gazben ýlanýdyń barlyq faktileri azamattardyń jylytý qondyrǵylaryna nemquraıly qaraýyna baılanysty. Sonymen birge úıler men páterlerdi jylytý úshin kóbinese qoldan jasalǵan jylytqyshtary qoldanǵan, ol óz kezeginde baspanaǵa ǵana emes adam ómirine de qaýip tóndiredi. «Jyl saıyn kúzde kún sýytysymen jáne jylytý maýsymy bastalmas buryn órt qaýipsizdik aılyǵy júrgiziledi, reıd sheńberinde departament qyzmetkerleri aýlalardy aralap úgit-profılaktıkalyq jumystardy kúsheıtedi. Jyl basynan beri 18370 turǵyn sektordaǵy úılerdi aralaý jumystary júrgizildi. Turǵyndarmen 198 kezdesý ótkizildi, osy sharada 5419 adam qamtyldy, sonymen qatar 256 nusqaýlyqtar júrgizildi. 12414 adamnyń qatysýymen 422 dárister ótkizildi», - dedi Memlekettik órt baqylaý bóliminiń bastyǵy Q.Nurǵazınov. T
Turǵyn úılerde órt qaýipsizdigin qamtamasyz etý, adamdardyń ómiri men densaýlyqtaryn saqtaý maqsatynda kelesideı órtke qarsy is-sharalardy oryndaý qajet: Úı aýlasyndaǵy aýmaqtardy taza ustaý, qoqystar men qaldyqtardy jaqpaý, shoq pen kúldi qurylysqa jaqyn tókpeý kerek. Sondaı-aq aqaýy bar nemese qoldan jasalǵan elektr jabdyqtaryn paıdalanbaý, qosýly turǵan elektr jabdyqtaryn qaraýsyz qaldyrmaý, jas balalarǵa janyp jatqan peshti qaraýdy tapsyrmaý qajet.
