Astanadaǵy ortalyq saıabaqta Qazaq handyǵynyń 550 jyldyǵyna arnalǵan teatrlandyrylǵan kórinis qoıyldy
Atalmysh is-shara qazaq memleketiniń qurylý jáne damý tarıhyn dáripteý, Qazaqstan tarıhyna belgili tulǵalardyń qosqan úlesin kórsetý jáne jastarǵa patrıottyq tárbıe berýge baǵyttalǵan.
Qoıylymnyń rejısseri Q. Qýanyshbaev teatrynyń dırektory, bas rejısseri Bolat Uzaqov, stsenarıı avtory belgili jazýshy, dramatýrg Dýman Ramazan. "Bir saǵatqa sozylatyn kóriniste biz Qazaq handyǵynyń negizin qalaǵan Kereı men Jánibek handardan bastap, sońǵy han Kenesaryǵa deıingi aralyqty qamtýǵa tyrystyq. Osy eki aralyqtaǵy iri isterimen erekshe atalatyn Áz Táýke, Abylaı syndy handardy da qoıylymǵa engizdik. Qoıylymdardyń arasynda ár dáýirdiń Asan Qaıǵy, Qaztýǵan, Buhar syndy jyraýlaryn da engizdik. Jalpy daıyndyq jumystary tórt aı boıy júrgizildi", - dep atap ótti B. Uzaqov. Qoıylym barysynda kórermender bes qarýyn asynǵan qazaq batyrlarynyń jekpe-jegin tamashalap, astyndaǵy tulparyn tik shapshytqan shabandozdardyń ónerin kórdi.