Astanadaǵy órt: jalynnyń taralýy toqtatyldy - TJK resmı ókili
ASTANA. QazAqparat - Astanada Bıznes ortalyǵynda ornalasqan dámhanadan shyqqan órttiń taralýy toqtatyldy. Bul týraly QR ІІM Tótenshe jaǵdaılar komıtetiniń resmı ókili Rýslan Imanqulov málim etti, dep habarlaıdy QazAqparat.
«Oqıǵa ornyna QR ІІM Tótenshe jaǵdaılar komıteti bólimsheleriniń 90-nan astam adamy jáne mamandandyrylǵan 27 tehnıkasy jumyldyryldy. Órtti sóndirý jalǵasýda. Jalynmen kúresti tıimdi júrgizý úshin ǵımarattyń shatyryn buzý jumystary júrgizilýde», - dep atap ótti Imanqulov.
Málim etilgendeı, tilsiz jaýmen kúres úshin 3 jaýyngerlik ýchaske jasaqtaldy, oqıǵa ornynda órtpen kúresti basqarý jónindegi jedel shtab jumys isteýde.
«Órt sóndirýshilerdiń kúshimen saǵat 01:43-te jalynnyń taralýy toqtatyldy. Ot sharpyǵan aýmaq shamamen 400 sharshy metrdi qurady», - dep habarlady resmı ókil.
Buǵan deıin habarlaǵanymyzdaı, 17 qyrkúıek kúni saǵat 22:49-da Astana qalasy Beıbitshilik kóshesindegi tórt qabatty «Órken» iskerlik ortalyǵynyń astyńǵy qabatynda ornalasqan «Draft» dámhanasynan órt shyqty . As daıyndaý bólmesinen shyqqan ot keıin ǵımarattyń shatyryna aýysqan. 40 adam qaýipsiz jerge kóshirildi.
