Astanadaǵy opera teatryna bir jylda 80 myń kórermen barǵan
Elorda teatrynyń baspasóz qyzmetinen málim etkendeı, búginde teatrǵa barý sánge aınalyp keledi. Asqaq ónerdi baǵalaıtyn jandardy san alýan repertýar, afıshadaǵy súıikti ártisterdiń esimderi qyzyqtyrsa, jańa kórermendi shara bastalardan buryn foıede paıda bolatyn ǵajaıyp atmosfera tartady. Álbette, bul aıryqsha atmosferany týǵyzatyn kórermenniń ózi – ásem kóılekke jasanǵan qyz-kelinshekter, kostıým kıgen er azamattar.
«Eske salamyz, «Astana Opera» teatrynyń ákimshiligi dress-kodty qatań saqtaýdy talap etpeıdi. Tek qonaqtardyń sándi kıimmen kelgenin, olardyń teatrda ótkizetin birneshe saǵaty merekedeı bolǵanyn qalaıdy», - delingen usynylǵan habarlamada.
Osy rette, teatrdyń baspasóz qyzmeti álemdik tájirıbede dress-kodtyń birneshe túri bar ekenin eske salǵandy jón kórgen.
«Máselen, opera men baletke barǵanda «qara galstýk» stılin saqtaǵan jón. Ádette, mundaı stılde kıingen meımandardy túrli marapattaý rásimderinde, tusaýkeserler men kınofestıvalderde kezdestirýge bolady. Áıelder etegi uzyn klassıkalyq keshki kóılek nemese kokteıl kóılek, ókshesi bıik aıaq kıim kıip, áshekeı buıymyn taǵyp, qoldaryna shaǵyn sómke ustasa, erlerge mundaı sharalarda qara smokıng kıgen jarasady», - deıdi teatr ókilderi.
Baspasóz qyzmeti dress-kodtan bólek, mádenıettiń taǵy bir belgisin eske salady – ol qoıylymǵa keshikpeı kelý. Keshigý – ádepsizdik sanalady.
«Teatr tártibine sáıkes, qonaqtar zalda otyrǵan basqa kórermenge, sondaı-aq ártisterdiń óner kórsetýine kedergi keltirmeý úshin úshinshi qońyraýdan keıin parterge óte almaıdy. Kópshilik spektaklge 10 mınýt qalǵanda óz oryndaryna jaıǵasady. Sondaı-aq zalǵa tamaq, sý jáne basqa sýsyndardy ákelýge bolmaıdy, spektakl bastalardan buryn uıaly telefondar men dybys shyǵaratyn ózge de qurylǵylardy óshirip qoıý qajet.
Aıta ketetin taǵy bir jaıt, eresekterge arnalǵan spektaklderge balalardy ertip ákelmeýge keńes beriledi, sebebi «Astana Operanyń» repertýarynda balǵyn kórermenderge arnalǵan basqa da kóptegen qyzyqty jobalar bar.
Bylaı qarasańyz, munyń bári qarapaıym erejeler sekildi kórinedi. Alaıda olardy saqtaı otyra, barlyǵymyz kórermen mádenıetin qalyptastyramyz», - delingen teatrdyń baspasóz baıandamasynda.
