Astanadaǵy onkologııalyq ortalyq eń ozyq quraldarmen jabdyqtalady - Dılıara Qaıdarova
ASTANA. QazAqparat - Astanada Onkologııa jáne pallıatıvtik kómektiń ózekti máselelerine arnalǵan halyqaralyq ǵylymı-tájirıbelik konferentsııa ótip jatyr, dep habarlaıdy QazAqparat tilshisi.
Jıynda QR Densaýlyq saqtaý mınıstrliginiń bas onkolog-dárigeri, Qazaq ulttyq onkologııa jáne radıologııa ınstıtýtynyń dırektory Dılıara Qaıdarova Astanada ashylatyn jańa onkologııalyq ortalyqtyń eń zamanaýı tehnıkalarmen jabdyqtalatynyn jetkizdi.
«Jańa onkologııalyq ortalyqta jańa ádister men dıagnostıkalaýdy engizgimiz keledi. Onda molekýlıarlyq-dıagnostıkalyq zertteý, kıber-pyshaq jáne qaterli isikti erterek anyqtaýǵa múmkindik beretin tomoterapııa qoljetimdi bolmaq. Protondyq terapııa 2021 jylǵa deıin qalypty emdeý túrine aınalatyn shyǵar. Protondyq sáýleler rentgendik sáýlelerge qaraǵanda, anaǵurlym tıimdi emdeıdi. Biz naýqastarǵa, ásirese balalarǵa joǵary mamandandyrylǵan kómek kórsete alatyn ortalyq qurǵymyz keledi», - dedi bas onkolog.
Sonymen birge, Qazaqstanda aýrýdy basatyn pallıatıvti kómekti damytý - ózekti máselege aınalyp otyr.
«Pallıatıvti kómek boıynsha Almatyda ashylǵan eki brıgada tabysty qyzmet etip jatyr. Astana men Semeıde ashylǵan mobıldik brıgadalar naýqastyń úıine baryp, pallıatıvti kómek kórsetýde. Sonymen birge Astanada hospıster ashý josparlanyp otyr. Aýrýhanalar hospıs retinde qaıta jabdyqtalady. Qala ósip keledi. Sondyqtan, orynnyń kóbirek bolýyn qamtamasyz etý kerek», - dedi D.Qaıdarova.
Aıta keteıik, Memleket basshysy óziniń halyqqa arnalǵan Joldaýynda medıtsınalyq qyzmet sapasynyń halyqtyń áleýmettik kóńil-kúıiniń asa mańyzdy komponenti bolyp sanalatynyn aıtty. Prezıdent 2019 jyly Astanada Ulttyq ǵylymı onkologııalyq ortalyqtyń qurylysyn bastaýdy tapsyrdy.
