Astanadaǵy óńirlerdiń dástúrli aýyl sharýashylyǵy jármeńkeleri qyrkúıektiń 12-inen jalǵasady
ASTANA. QazAqparat - Astanadaǵy óńirlerdiń dástúrli aýyl sharýashylyǵy jármeńkeleri qyrkúıektiń ortasynan jalǵasady. Bul týraly búgin Ortalyq kommýnıkatsııalar qyzmetindegi baspasóz máslıhatynda Astana ákiminiń orynbasary Andreı Lýkın málim etti.
«Byltyr jáne bıyl biz 285 mln. teńgege 3,5 myń tonna ónim satyp aldyq. Turaqtandyrý qoryndaǵy ónimder naryqtaǵyǵa qaraǵanda Astananyń áleýmettik-kásipkerlik korporatsııalarynyń áleýmettik pavılondary men saýda jelileri arqyly 15-20 paıyzǵa arzan saýdalanýda»,-dedi ol.
Belgili bolǵandaı, qazirgi kezde turaqtandyrý qorynda 546 tonna ónim saqtalýda, onyń ishinde 285 tonnasy kúrish, 200 tonna qant, 62 qaraqumyq bar.
«Sonymen qatar elordada búgine aýyl sharýashylyǵy jármeńkeleri ótkizilýde. Bul jármeńkelerge negizinen óndirýshilerdiń ózderi tikeleı qatysýda. Olardyń usynyp otyrǵan baǵalary naryqtyq deńgeıden 10-15 paıyzǵa tómen»,-dedi ákim orynbasary.
Osy kúnge deıin 102 aýyl sharýashylyǵy taýarlaryn óndirýshilerdiń qatysýymen 44 jármeńke uıymdastyryldy. Jármeńkeler bastalǵaly 56 mln. teńgeniń 471 tonna ónimi satyldy.
Budan bólek, qazirgi kezde óńirlerdiń qatysýymen qosymsha jármeńkeler ótkizilýde. «Bıylǵy 12 qyrkúıekten bastap elimizdiń óńirleriniń jármeńkelerin uıymdastyrý josparlanýda. Osy oraıda tıisti kelisimderdi qolymyzǵa aldyq»,- dedi A. Lýkın.
