Astanadaǵy Oqýshylar saraıynyń aldyna erekshe órt sóndirý kóligi «kelip toqtady»
ASTANA. QazAqparat - Elordalyq órt sóndirýshiler balalar men ata-analardy tilsiz jaýdan saqtandyrýdyń ózgeshe ádisin iske asyrdy, dep habarlaıdy QazAqparat tilshisi.
Astana qalasy Almaty aýdandyq Tótenshe jaǵdaılar basqarmasynyń qyzmetkerleri órtke qarsy nasıhat jumystaryn belsendi túrde júrgizip jatyr.
Elordalyq órt sóndirýshiler órt qaýipsizdigin saqtaý sharalarynyń nasıhattaý úshin bul joly tyńǵa túren salǵan. Naqtyraq aıtqanda, TJB qyzmetkerleri Oqýshylar saraıy aýmaǵyna muzdan oıyp otyryp, órt sóndirý kóligin turǵyzypty. Muzdan jasalǵan kólikte órt sóndirý qyzmetiniń 101 nómiri de jazylǵan.
«Atalǵan konstrýktsııa ata-analar men balalardyń órt qaýipsizdigine basa nazar aýdarý úshin jasalǵan. Kúndelikti jumysynda órt sóndirýshilerdiń eń aldymen tilsiz jaýdan kópti eskertip, saqtandyryp júrgeni abzal», - delingen qalalyq Tótenshe jaǵdaılar departamentiniń Feısbýktegi habarlamasynda.
