Astanadaǵy OQO kúnderi: Qurban aıtqa jaıylǵan dastarxannan 5 myńdaı adam dám tatty
ASTANA. QazAqparat - Qurban aıt merekesi kúni Astana qalasyndaǵy «Qazanat» atshabaryndaǵy etno aýylda Ońtústik Qazaqstan oblysynyń kúnderi aıasynda xalyqqa dastarhan jaıylyp, 300 keli palaý taratyldy. Aıttyq dastarxannan bes myńǵa jýyq adam dám tatty. Sharanyń maqsaty - asyl dinimizdiń qundylyǵyn arttyryp, qazaq halqynyń darhandyǵy men mádenıetin pash etý, dep habarlaıdy OQO ákimdiginiń baspasóz qyzmeti.
Sharada sóz alǵan Ońtústik Qazaqstan oblysy ákiminiń orynbasary Ulasbek Sádibekov barsha astanalyktardy Qurban aıt meıramymen quttyktady.
«Ózderińizge málim, 2017 jylǵy 29 tamyz - 3 qyrkúıek aralyǵynda «EKSPO-2017» halyqaralyq mamandandyrylǵan kórmesi aıasynda Astana qalasynda Ońtústik Qazaqstan oblysynyń kúnderi ótýde. Qurban aıt - Allany eske alýǵa sebepker bolatyn jáne adamdardyń bir-birine qaıyrym jasaýyna uıytqy bolatyn erekshe dinı rásim. Qasıetti Qurban aıt merekesinde yntymaq pen birligimizdi, ózara tatýlyǵymyzdy arttyrý maqsatynda, oblys basshysy atynan Astanalyqtarǵa jáne Elorda qonaqtaryna arnaıy dastarhan jaıyp as taratylyp otyr», - dedi Ulasbek Sádibekuly.
Shara barysynda Qurban aıt merekesine oraı bir iri qara men eki qoı qurbandyqqa shalynyp, 1 tonna baýyrsaq pisirildi. Qala turǵyndary men qonaqtaryna Tólebı aýdanynyń qymyzy men Otyrar aýdanynyń shubaty usynyldy. Sondaı-aq kelýshilerge ońtústiktiń táttiligi til úıirer jemis -jıdekteri men qaýyn-qarbyzy tegin úlestirildi.
Oblystyń mádenı, tarıhı kelbetin aıqyndaıtyn 2000-ǵa jýyq qundy jádigerler men qylqalam jáne qolóner sheberleriniń týyndylary da Astana halqy men EKSPO qonaqtary nazaryna usynyldy. Sonyń ishinde qazaq tarıhynda orny aıyryqsha Kenesary Qasymulynyń qylyshy da bar. 
Etno aýyldaǵy ulyq merekeniń kórkin Ońtústik Qazaqstan oblystyq fılarmonııasynyń ánshileri qyzdyra tústi. Kúmis kómeı, jez tańdaı ánshiler kıiz úılerdi aralaı júrip, qazaqtyń dástúrli ánderin naqyshyna keltirip oryndap, kópshilik yqylasyna bólendi.
