Astanadaǵy OQO kúnderi aıasynda «Shanshar», «Aldaraspan» óner kórsetedi
ShYMKENT. QazAqparat - Astanada 29 tamyz -3 qyrkúıek kúnderi Ońtústik Qazaqstan oblysynyń kúnderi ótedi. Óńirdiń mádenıeti men ónerin kórsetý aıasynda 42 sharadan turatyn is-sharalar kestesi qurylǵan, dep habarlaıdy «QazAqparat» HAA tilshisi.
Aıtýly shara Ońtústik Qazaqstan oblysynyń mádenıeti men ónerin, óndiristik-ekonomıkalyq múmkindikteri men taýarlaryn, tarıhı-mádenı oryndaryn, kóne qalashyqtaryn kórsetý maqsatynda uıymdastyrylyp otyr. Sondaı-aq shara barysynda ońtústiktiń brendi retinde tanylatyn kıeli jerleri men týrıstik áleýettin Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy basymdylyqtarmen ushtastyra otyryp, kórsetý kózdelýde. Josparlanǵan 42 shara barysynda «Qutty ólke qolóneri» qolóner sheberleriniń kórmesi, «Túrki eliniń túp tamyry - Ońtústikten mereıli Astanaǵa sálem!» óner kerýeni, «Sálem Astana, sálem EKSPO-2017!» Ońtústik Qazaqstan oblysy óner sheberleriniń kórmesi, Qazaqstan Respýblıkasynyń Konstıtýtsııasy kúnine arnalǵan «Aıbary myqty-Ata zań» saltanatty kontsertik baǵdarlamasy, «Ońtústik jastary shaqyrady» atty merekelik kontserti uıymdastyrylady.
Sonymen qatar, «Ulysymnyń uıytqysy-Ońtústik» aqyn, jazýshylardyń shyǵarmashylyq kezdesý keshi jáne «Tulǵa, Táýelsizdik, Tarıh», «Jahan tanyǵan jeti tulǵa» kitabynyń tusaýkeseri ótedi. Aýyz ádebıetinde ejelden qalyptasqan poezııalyq janry aıtys ónerin dáripteýge arnalǵan «Biz - EKSPO-ny jyrlaımyz» Halyqaralyq aqyndar aıtysy bastaý alady.
Tarıhı-mádenı oryndar, kóne qalashyqtaryn, Ońtústiktiń brendi retinde tanylatyn kıeli jerleri men týrıstik áleýeti týraly Ońtústik óńirinde 800-ge jýyq kıeli jerler ornalasqandyǵyn, áýlıeli, tarıhı jerlerge baı ekendigin tanystyrý maqsatynda "Tolaǵaı", "Qazaqstan barysy", "Qazaqstan brendi", "Otyrar dastany", "Muńlyq - Zarlyq", "Náýrizek" anımatsııalyq kórkemfılmderi men vıdeorolıkteri kórsetiledi.
Sharaǵa óńirdiń tarıhı qundylyǵy men erekshe mádenı kelbetin dáripteıtin eń kórnekti jádigerler ornalastyrylady.
Sondaı-aq qazaq kúresiniń darabozy atanǵan Qajymuqan babamyzdyń ómirine, palýandyǵy men patrıottyǵyna kýá bolar fotosýretter men tarıhı qysqa metrajdy derekti fılmder álemdik saıystardan jeńip alǵan orden-medaldary jáne 74 jasynda Uly aqynymyz Abaı Qunanbaıulynyń 100 jyldyq mereıtoıyna kıip barǵan kıimderi, jattyǵý kezinde paıdalanǵan kir tastary elorda jurtshylyǵynyń nazaryna usynylmaq.
Sonymen qatar, júz myńnan asa qundy jádigeri bar Ońtústik mýzeıleri qazynasynda ózindik orny men tarıhy ózgeshe dúnıe - qazaqtyń sońǵy hany Kenesary Qasymulynyń qylyshy da halyqaralyq kórme qonaqtaryna usynylatyn bolady.
«Túrkistan - Túrki áleminiń mádenı astanasy» jyly aıasynda ótken fotosýretshiler kezdesýinde Ońtústiktiń kıeli jerlerine qatysty túsirilgen fototýyndylardan arnaıy kórme, óńirdiń tarıhı, kıeli jerlerinen de maǵlumattar beriledi.
Ońtústik Qazaqstan oblysynyń óndiristik-ekonomıkalyq múmkindikteri men taýarlarynan quralǵan aýylsharýashylyq ónimderi men taýarlarynyń jármeńke kórmesi uıymdastyrylady. Sharada «Ońtústiktiń qaýyn-qaǵy», «Qazyǵurttyń qymyzy», «Shardaranyń balyǵy», «Saryaǵashtyń shıpaly sýy», «Túlkibastyń almasy» ataýlarymen Ońtústik ónimderin usynylyp, naryqtaǵy baǵadan 15-20 paıyzǵa arzan saýdalanatyn bolady.
Jalpy sharanyń qorytyndysy 3 qyrkúıek kúni saǵat 18.00-de EKSPO qalashyǵynyń Amfıteatrynda Ońtústik Qazaqstan oblysynan shyqqan óner juldyzdary Jubanysh Jeksenuly, Seıfýllın Jolbarys, Altynaı Jorabaeva, Zattybek Kópbosynuly, Marjan Arapbaeva, Nurlan Ónerbaev sııaqty ánshiler men «Shanshar», «Aldaraspan», «Shymkent-shoý» ázil-syqaq teatrlarynyń qatysýmen ótetin gala-kontsertimen aıaqtalady.
