Astanadaǵy Nurjol boıyna kólik qoıýdyń aqyly júıesi iske qosyldy
ASTANA. QazAqparat - Búgin elordada «Astana qalasyndaǵy kólik turaǵyn basqarý» jobasynyń birinshi kezeńi testtik tártipte bastaý aldy.
Qala ákimdigi saıtynyń habarlaýynsha, qazirgi tańda kólik vedomstvasynyń mamandary avtokólik ıelerine tarıf, tólem tásilderine qatysty turaqty paıdalaný erejelerin túsindirýde. Al, 472 orynǵa arnalǵan kólik turaǵy Nurjol saıajolynda ornalasqan.
«Astana qalasyndaǵy kólik turaǵyn basqarý» jobasy Elordanyń kólik keshenderin jańǵyrtý baǵdarlamasy aıasynda qolǵa alynyp, vokzal mańy, kommertsııalyq parkıngter, joldaǵy turaqtar boıynsha kóshe-jol jelilerin qamtamasyz etý maqsatynda júrgizilýde. Atalǵan basqarý júıesi qaladaǵy kólik qoıatyn oryndarǵa monıtorıng júrgizý úshin, júrgizýshilerge bos oryndar týraly aqparat berýge, jol qozǵalys erejesi buzylǵan jaǵdaıda jáne turaq oryndaryna aqy tólenbegen kezderde avtomatty túrde tirkeý úshin qolǵa alynyp otyr.
Pılottyq joba quramyna 9 myń kólik qoıatyn oryndy qamtıtyn kóshe-joldardyń jelisi qarastyrylǵan.
Atalǵan joba joldyń júretin bóliginde uzaq ýaqytqa qoıatyn avtomobılderdi azaıtý arqyly kóshe-joldar jelisindegi júktemelerdi 20-30% kemitýge, kólik turaqtarynyń keńistigindegi kórsetkishti 40-50% azaıtýǵa jáne qoǵamdyq kólikterge suranysty 15-20% kóbeıtýge baǵyttalǵan. Sonymen qatar, joba qala ortalyǵyndaǵy kólik qozǵalystarynyń jyldamdyǵyn arttyrýǵa múmkindik beredi, JKQ oqıǵalaryn 70-80% deıin azaıtyp, jaıaý júrginshilerdiń, qoǵamdyq kólik quraldary men avtomobılderdiń qozǵalysyna qolaıly jaǵdaı jasaýǵa yqpal etedi dep kútilýde.
Jobany testileý kezinde kólik ıelerinen jańa júıemen keńirek tanysý maqsatynda turaqqa kólikti qoıý úshin aqsha talap etilmeıdi, deıdi jobany ázirleýshiler.
Eske salaıyq, avtokólik qozǵalystary tym kóp jerlerde aqyly turaqtardy qoıý arqyly birqatar mańyzdy máselelerdiń túıini sheshilmek. Álemdik tájirıbe boıynsha osyndaı jobalar keptelistiń oryn almaýy men jol erejeleriniń buzylý kórsetkishiniń azaıýyna múmkindik jasaıtyn eń tıimdi tásilderdiń biri.
Elorda turǵyndary men qonaqtary tolyǵyraq aqparatty Call-ortalyqtyń 8 800 080 28 88 nómiri arqyly nemese resmı astra-park.com saıtynan bile alady.
