Astanadaǵy «Nurbesik» azqabatty turǵyn úı kesheni josparǵa saı salynýda
ASTANA. 26 qyrkúıek. QazAqparat - Erteń, 27 qyrkúıekte saǵat 11-00-de Astana qalasy, Caryarqa aýdany, Kóktal kenti «Nurbesik» azqabatty turǵyn úı kesheninde alys-jaqyn shetelderden qonys aýdarǵan aǵaıyndardyń qatysýymen jáne Respýblıkalyq «Asar» qoǵamdyq birlestiginiń uıymdastyrýymen «Erkin eldegi baqytty shańyraq» atty shara uıymdastyrylmaq.
Bul týraly Respýblıkalyq «Asar» qoǵamdyq birlestigi habarlap otyr.
Elbasynyń qoldaýymen jáne Astana qalasy ákiminiń sheshimi boıynsha Astana qalasyna alys jáne jaqyn shetelderden qonys aýdarǵan aǵaıyndardyń baspanaly bolýy úshin Saryarqa aýdany, Kóktal kenti aýmaǵynan azqabatty turǵyn úı keshenin salýǵa jer telimi bólingen bolatyn.
Osy sheshimge sáıkes turǵyn úı kesheniniń bas jospary bekitilgen bolatyn. Keshende boı kóteretin árbir obektiniń eskızdik jobalary daıyndalyp, bektilgen. Keshen aýmaǵy qorshalyp, elektr júıesi tartylǵan.
Qala ákiminiń 2010 jylǵy 9 maýsymdaǵy №37-502P Sheshimi boıynsha turǵyn úı kesheniniń birinshi kezeńiniń qurylys jumystaryn júrgizýge ruqsat berilip, aǵaıyndardyń óz kúshterimen jeke turǵyn úı salý jumysy bastalǵan bolatyn. Búgingi kúni oralman aǵaıyndar turǵyn úılerin bekitilgen jobaǵa sáıkes salyp, qonystana bastady.
«Bul táýelsiz Qazaq eliniń tynyshtyǵy men Elbasynyń turǵyn úı jáne kóshi-qon salasyndaǵy sarabdal saıasatynyń jemisi, Astana qalasy ákiminiń úlken qoldaýy. Qonys tepken aǵaıynnyń alǵys-tilegi osy», - deıdi sharany uıymdastyrýshylar.
Sharanyń bastapqy bóliminde «Asar» qoǵamdyq birlestigi keńsesinde «Nurbesik» turǵyn úı kesheni josparymen, atqarylǵan istermen qysqasha tanystyrý, sosyn «Nurbesik» turǵyndarymen júzdesip, olardyń tynys-tirshiligimen tanysý josparlanyp otyr.
