Astanadaǵy Nazarbaev Zııatkerlik mektebi CIS halyqaralyq akkredıtteýinen ótti
ASTANA. QazAqparat - Astanadaǵy Nazarbaev Zııatkerlik mektebi CIS halyqaralyq akkredıtteýinen ótti. Bul týraly búgin bilim berý salasy qyzmetkerleriniń dástúrli tamyz keńesi barysynda «Nazarbaev Zııatkerlik mektebi» AQ Basqarma Tóraǵaıymy Kúlásh Shámshıdınova málim etti.
«Biz tamyz keńesin jaqsy ári qýanyshty jańalyqpen bastaǵaly otyrmyz. Astanadaǵy Nazarbaev Zııatkerlik mektebiniń baǵdarlamasy alǵash ret avtorızatsııadan ótken edi. Bul mektep osylaısha tuńǵysh ret CIS (Halyqaralyq mektepter keńesiniń) halyqaralyq akkredıtteýinen ótti. Bul bizdiń negizgi baǵyttarymyzdyń biri bolatyn. Endigi mindet kelesi jyldyń aıaǵyna deıin taǵy da respýblıkamyzdaǵy 15 Nazarbaev Zııatkerlik mektebin halyqaralyq akkredıtteýden ótkizý. Al Astanadaǵy bilim nysany - bul bizdiń alǵashqy qarlyǵashymyz. Bul bizdiń muǵalimderdiń ǵana emes, oqýshylarymyz ben ata-analar komıtetiniń birlesken jumysynyń jemisi», - dedi K. Shámshıdınova.
Aıta keterligi, Nazarbaev Zııatkerlik mektebinde ótip jatqan tamyz keńesi «Zııatkerlik kóshbasshylyq: damýdyń turaqtylyq negizi» taqyrybynda ótýde. Alqa májilisi onlaın-beıne kórsetilim arqyly taralyp, oǵan 2 myńnan astam qyzmetkerler qatysty.
Halyqaralyq mektepter keńesi (CIS) - mektepterdi akkredıtteýmen jáne bilim berýdiń jetekshi ádistemelerin daıyndaýmen aınalysatyn halyqaralyq bilim berý júıesindegi uıym. CIS - bul álemniń 112 memleketinde 697 mektep pen 508 ýnıversıtetter men kolledjderdi qamtyp otyrǵan kommertsııalyq emes halyqaralyq qaýymdastyq uıymy. CIS álemniń 50 úzdik ýnıversıtetterimen yntymaqtasady. 
