Astanadaǵy muz qalashyqta 5 myń tekshe metrden artyq muz ben 7 myń tekshe metr jasandy qar paıdalanylady (FOTO)
ASTANA. QazAqparat - Muz qalashyqtar men muz aıdyny - elorda turǵyndarynyń qys kezinde demalatyn orny. Muzdan jasalǵan túrli músinder, pishinder men kompozıtsııalar qala turǵyndary men qonaqtaryna qys boıy qýanysh syılamaq. Eń úlken muz qalashyǵy «Han shatyr» SOO janynda ornalaspaq, dep habarlady qalalyq ákimdiktiń baspasóz qyzmetinen.
Qazirgi kezde jumystar qarqyndy júrip jatyr. Bıiktigi 25 metrdi quraıtyn elimizdiń jańajyldyq bas shyrshasy muz qalashyqtyń ortasyna ornatyldy. Shyrsha jyltyraqtarmen, túrli-tústi folga qaǵazdarmen oralǵan sharlarmen bezendirilip, túngi ýaqytta gırlıandalar janyp turady. Mádı Qanapın, «QazDekor» kompanııasynyń dırektory: - Muz arnaıy jabdyqpen óńdeledi, ıondalady, erip ketý qaýpine az ushyraıdy. Barlyq ınstallıatsııalarda jaryq ıllıýmınatsııalyq shamdar qarastyrylǵan, ıaǵnı túngi ýaqytta óte ádemi bolady. Qalashyqtyń alańy eki myń sharshy metrge jýyq. Munda bes myń tekshe metrden artyq muz ben jeti myń tekshe metr jasandy qardy paıdalaný josparlanǵan. Qalashyq aýmaǵynda muz aıdyny, muz tóbeshikteri, qardan jasalǵan músinder, mýltfılmderdiń keıipkerleri, qardan jasalǵan panno jáne t.b. bolady. Pannodan Astananyń ataýly nysandaryn kórýge bolady. Budan basqa úsh qysqy qalashyq qalalyq ákimdiktiń aldyndaǵy alańda, Esil ózeninde jáne Otan Ana monýmentiniń janynan ashylady.
