Astanadaǵy memlekettik organdar oıdan shyǵarylǵan 70 túrli qyzmetti kórsetýde
QR Memlekettik qyzmet isteri jáne sybaılas jemqorlyqqa qarsy kúres agenttiginiń Astana qalasy boıynsha departamenti mamandary memlekettik qyzmetterdi retteıtin zańnamany zerdeleý kezinde 67 olqylyq pen bir-birine qaıshy keletin tustardy tapty. Al elordadaǵy memlekettik organdar zańnyń osy bir kemshin tusyn paıdalanyp, 70 jasyryn qyzmetti kórsetýde. Al «jasyryn memlekettik qyzmet» degenimiz ne? Ol túr-turpaty jaǵynan memlekettik qyzmetke jatsa da, memlekettik qyzmetterdiń reestrine kirmeıdi. Demek, oǵan qatysty standart ta joq, reglament te joq. Mine, dál osyndaı jasyryn qyzmetter jemqorlyq áreketterge jol ashady.
"Jasyryn qyzmetter jer qatynastary, bilim berý, densaýlyq saqtaý, kóshi-qon, turǵyn-úı, qorǵanys pen sáýlet basqaramalarynda anyqtaldy. Atalǵan organdarda jumys isteıtin qyzmetkerler ruqsat alýǵa kelgen adamdardan qosymsha qujat surap, esh sebepsiz ýaqytty sozyp otyrady. Máselen, 15 memlekettik organda qyzmetti der kezinde kórsetpeý boıynsha 12 000 fakti anyqtaldy. Osy ýaqytqa deıin 6 adam tártiptik jazaǵa tartyldy", - deıdi memlekettik qyzmetter basqarmasynyń basshysy Gúlnur Sámenqulova.
Aıta keteıik, jaqynda Astanada ótken jıyndardyń birinde jer qatynastary men turǵyn-úı basqarmalarynyń jetekshilerin tártiptik jazaǵa tartý máselesi kóterilgen bolatyn. Sebebi atalǵan eki organda jemqorlyq áreketterge sebep bolatyn jasyryn memlekettik qyzmetter kórsetiledi. "Jaqyn arada biz osy materıaldardy etıka boıynsha arnaıy keńestiń talqysyna shyǵaryp, atalǵan eki basqarmanyń bastyǵyn tártiptik jazaǵa tartý máselesin kóteretin bolamyz», - dedi QR Memlekettik qyzmeti isteri jáne sybaılas jemqorlyqqa qarsy kúres agenttiginiń Astana qalasy boıynsha departamentiniń jetekshisi Roman Kım.