Astanadaǵy memaýdıtorlar isi: «Qazaqavtojol» basshylary para bergenderin moıyndady
ASTANA. QazAqparat - Astanada Esep komıtetiniń eki memlekettik aýdıtoryna qatysty ótken sot protsesinde «Qazaqavtojol» RMK tarapynan bes sottalýshy para bergenderin moıyndady, dep habarlaıdy «QazAqparat» HAA tilshisi.
Astana qalalyq sotynyń baspasóz qyzmetiniń málimetine sáıkes, 2017 jyldyń 17 qazanynda Respýblıkalyq bıýdjettiń atqarylýyn baqylaý jónindegi esep komıtetiniń eki memlekettik aýdıtory B.Qopobaevaǵa, A.Jáńgirbaevaǵa jáne «Qazaqavtojol» RMK basshylary men basqarma jetekshilerine qatysty qylmystyq is sotqa kelip tústi. Qylmystyq is boıynsha barlyǵy 9 adam zań aldynda jaýap berip jatyr.
Aıyptaý tarapynyń paıymdaýynsha, B.Qopobaeva men A.Jáńgirbaeva 2016 jyldyń qarasha aıynda «Qazaqavtojol» kásipornyna tekserý júrgizýdi bastaǵan. Tekserý barysynda bıýdjettik jáne qarjylyq zańnamanyń buzylǵany anyqtalady. Atalǵan buzýshylyqtarǵa kóz juma qaraý úshin olar «Qazaqavtojol» basshylyǵynan 60 myń AQSh dollar, ıaǵnı 20 mıllıon teńge talap etken. Aýdıtorlarǵa osylaısha, 15 mıllıon teńge tapsyrylǵan.
Budan keıin atalǵan qylmystyń barlyq qatysýshylary ustaldy.
Qylmystyq isti qaraý barysynda «Qazaqavtojol» RMK bas dırektory S.Muqashev pen onyń orynbasary E.Shámishevten, basqarma basshylary K.Ájiǵulovtan, B.Elemesov pen kásiporynnyń Qaraǵandy oblystyq fılıalynyń dırektory G.Muqanovadan kináni moıyndaý týraly protsessýaldyq kelisimge kelý boıynsha ótinim kelip túsken.
Bıylǵy jyldyń 14 qarashasynda memlekettik aıyptaýshylar kináni moıyndaý týraly bes sottalýshymen jasalǵan protsessýaldyq kelisimderderdi tanystyrdy. Olardyń barlyǵy toptasyp, aldyn ala sóz baılasyp, QR Qylmystyq kodeksiniń 367-baby 3-bóliginiń 1,2-tarmaqtaryna sáıkes, iri kólemde para bergenin moıyndaǵan. Atalǵan bap 7-den 12 jylǵa deıin bas bostandyqtan aıyrýdy nemese para somasynyń 40 eselengen kólemin qaıtarýdy kózdeıdi.
Protsessýaldyq kelisimge sáıkes, Astana prokýratýrasy QR QK-niń 55-baby 4-bóligin negizge ala otyryp, (atalǵan qylmystyq buzýshylyqta qarastyrylǵan jazadan góri jeńil jaza taǵaıyndaý) bes sottalýshyǵa shartty túrde bas bostandyǵyn shekteý túrindegi jeńil jazany taǵaıyndaýdy surady. Naqtyraq aıtqanda, S.Muqashevke - 5 jyl, E.Shámishevke, - 4 jyl, K.Ájiǵulovqa, B.Elemesov pen G.Muqanovqa 3 jyl merzimge bas bostandyǵyn shekteý jazasyn taǵaıyndaý suraldy.
24 qarasha kúni Astana qalasynyń Almaty aýdandyq №2 soty protsessýaldyq kelisim boıynsha suralǵan jazamen kelispeı, isti qaıta prokýratýraǵa qaıtardy.
Eske sala ketsek, 20 jeltoqsan kúni Sybaılas jemqorlyqqa qarsy Ulttyq bıýronyń baspasóz qyzmeti Respýblıkalyq bıýdjettiń atqarylýyn baqylaý jónindegi esep komıtetiniń eki memlekettik aýdıtory B.Qopobaeva men A.Jáńgirbaeva para aldy degen kúdikpen ustalǵanyn habarlaǵan bolatyn. Olarmen birge «Qazaqavtojol» RMK basshylary da kúdikke ilinip, atalǵandardyń barlyǵy ýaqytsha oqshaýlaǵyshqa qamaldy.
