Astanadaǵy mektepte balany lagerge májbúrlep jiberý shaǵymy tekserildi
ASTANA. QazAqparat - Astana turǵyny «Dıskaverı Býrabaı» jazǵy demalys lagerine joldamany májbúrli túrde alǵyzyp jatqandyǵyna shaǵymdandy, dep habarlaıdy QazAqparat.
Dınara Qasenovanyń sózine qaraǵanda, 75 myń teńge turatyn joldamany satyp alýdan bas tartqany úshin №64 mekteptiń lıtseılik 5 «Ǵ» synybynyń jetekshisi balany basqa qarapaıym synypqa aýystyratyny týraly aıtqan. «Bul jaıt meniń ashýymdy keltirdi. Qalaısha lagerdiń múddesin qorǵaýda? Osy arqyly zańnamany elemeı otyr», - dep jazdy ol áleýmettik jelide.
Astananyń Bilim basqarmasy osy shaǵymǵa nazar aýdaryp, arnaıy komıssııa qurdy. Onyń quramyna máslıhat depýtaty, basqa mektepterdegi dırektorlar men ata-analar komıtetteriniń músheleri endi. Komıssııa otyrysynda №64 mekteptiń jáne 5 «Ǵ» synybynyń ata-analar komıtetiniń ókilderi shaqyrtyldy.
Basqarma málimetinshe, bul mektepte balalardyń jazǵy demalysyn uıymdastyrý sharalary 6 jyldan beri iske asyrylyp keledi. Sonymen birge jyl saıyn lıtseılik synyptardaǵy oqýshylardyń tek 19-24 paıyzy ǵana lagerge barýǵa nıet tanytatyndyǵy belgili boldy.
Qyrkúıekte ata-analar jınalystarynda balalaryn demalys oryndaryna aparýǵa sheshim jasaǵan ata-analar legerge jibere alatyny týraly habarlandy. Osy oraıda uıymdastyrylatyn oryn men joldamanyń baǵasy jónindegi tolyq aqparatty túsindirý osy aıǵa josparlanǵan eken. Ótken jyldarda balalar basqa lagerge barǵan kórinedi (Dıskaverı Býrabaı emes) jáne joldama quny 53 myń teńge, al jeńildikti sanatqa 26 500 teńge bolǵan.
«5 «Ǵ» synyby men mekteptiń ata-analar komıtetteri ókilderi jazǵy lagerge barýǵa májbúrleý oqıǵalarymen osyǵan deıin kezdesken joq. Osy oraıda barlyq aıtylǵan málimetter balalardy qarapaıym synypqa aýystyrý syltaýymen lagerge jiberýdi májbúrleý faktisi rastalmaǵanyn kórsetip otyr», - dedi Astana qalalyq Bilim basqarmasy basshysynyń orynbasary Ánýar Janǵozın atalǵan shaǵymǵa jaýap berý kezinde.
