Astanadaǵy mektepke «jarylǵysh zat» qoıǵan bala ustaldy
ASTANA. QazAqparat - Astanalyq polıtseıler qala mektepteriniń biri jarylatynyn habarlaǵan oqýshyny qolǵa túsirdi, dep habarlaıdy QazAqparat tilshisi.
Belgili bolǵandaı, 14 qarasha kúni saǵat 08:00 shamasynda 102 nómirine mektep dırektory habarlasyp, belgisiz bireýdiń saǵat 11:00-de mekteptiń jarylatyny týraly habar bergenin jetkizgen.
«Birer mınýttyń ishinde oqıǵa ornyna polıtsııa qyzmetkerleri jetip, qaýipsizdikti qamtamasyz etý úshin aýmaqty qorshaýǵa alyp, oqýshylardy, pedagogtar men personaldy syrtqa shyǵardy. Jalpy, jıyny 1800-ge tarta adam qaýipsiz jerge kóshirildi. Saǵat 10:05 shamasynda tekserý jumystary aıaqtalyp, qorshaý alynyp tastaldy. Tekserý barysynda eshqandaı qaýipti nemese tyıym salynǵan zat tabylǵan joq. Jedel izdestirý jumystarynyń barysynda kámelet jasyna tolmaǵan 15 jastaǵy bala ustaldy. Ol buzaqylyq pıǵylmen mekteptiń jarylatyny týraly habarlap, qońyraý shalǵan. Qazir terrorızm aktisi týraly jalǵan habarlama taratý faktisi boıynsha sotqa deıingi tergeý amaldary júrip jatyr», - Astana qalalyq Polıtsııa departamentiniń baspasóz qyzmetinen.
Atalmysh is boıynsha bala kámelet jasyna tolmaǵandyqtan, oqýshynyń qylmysy úshin ata-anasy nemese zańdy ókilderi jaýapkershilikke tartylýy múmkin.
